Ինձ շատ քիչ է հետաքրքրում, թե այս կամ այն գերատեսչությունը ոնց է դրան վերաբերում. «Իմ քայլը» խմբակցության անդամ

Երեւան քաղաքի ավագանու արտահերթ նիստին ավագանու «Իմ քայլը» խմբակցության անդամ Արսեն Կարապետյանը՝ խոսելով Արամի 23–ում շենքի պատի փլուզման հարցից համոզմունք հայտնեց, որ տեխնիկական տեսանկյունից որեւէ խնդիր չկա, պարզապես պետք է մեծ ցանկություն ունենալ. «Այդ շենքը 120 տարի կանգնած էր անվնաս, խնդիրներ առաջացան այն ժամանակ, երբ քաղաքի նախկին իշխանությունները ոչ այդքան ճիշտ նախագիծ հաստատեցին եւ թույլ տվեցին փոսը քանդել ոչ ճիշտ տեխնիկական տեսակետից»։ Արսեն Կարապետյանը շեշտեց՝ այսպիսի հարցերում վերջին մեղավորը միշտ պատվիրատուն է. «Այսինքն՝ եթե մենք հստակ խաղի կանոններ առաջարկենք, որեւէ պատվիրատու չեմ կարծում դեմ գնա քաղաքի որոշումներին: Մենք պատասխանատու ենք քաղաքի տարածքում մշակութային ժառանգության պաշտպանության համար, եւ անձամբ ինձ շատ քիչ է հետաքրքրում, թե այս կամ այն գերատեսչությունը ոնց է դրան վերաբերում եւ ում է մեղավոր համարում դրանում, մենք պետք է անենք հնարավորն ու անհնարը մեր մշակութային ժառանգությունը պահպանելու համար»։