Ոչ ոք ի զորու չէ միանգամից փոխել հայ-ռուսական հարաբերությունների ուղղվածությունը. Արա Աբրահամյան

Ռուսաստանի հայերի միության և Համաշխարհային հայկական կոնգրեսի նախագահ Արա Աբրահամյանը Միացյալ Նահանգների հեռուստատեությամբ անդրադարձել է Հայաստան-Ռուսաստան հարաբերություններին: «Ռուսաստանն ու Հայաստանը ամենամերձավոր դաշնակից երկրներ են, մեզ կապում են ոչ միայն սերտ պայմանագրային պարտավորությունները, այլև հարյուրամյակներով ձևավորված կապերն ու հարաբերությունները: Ես համոզված եմ, որ դրանք առաջիկայում էլ կամրապնդվեն և կզարգանան, և դա տեղի կունենա ոչ ի վնաս այլ երկրների հետ Հայաստանի հարաբերությունների: Ոչ ոք ի զորու չէ միանգամից փոխել հայ-ռուսական հարաբերությունների ուղղվածությունը: Որպես հասարակական-քաղաքական գործիչ, ես լավատեղյակ եմ ռուսական ղեկավարության տրամադրությունների մասին և կարող եմ համարձակորեն պնդել, որ ոչ ոք չի պատրաստվում Հայաստանից պահանջել սահմանափակել իր կապերը ի հաճո Ռուսաստանի: Ռուսաստանի հետ պայմանագրային պարտավորությունների և կապերի խզումը Հայաստանի համար բնավ ազատության և անկախության դրսևորում չէ, ինչպես ոմանք կարծում են, այլ կարող է ազդակ հանդիսանալ, որ վաղը կարող են նույն կերպ խզվել Ամերիկայի, Եվրոպայի և մյուսների հետ պայմանավորվածությունները»,–այդպիսի կարծիք է հայտնել Լոս Անջելեսում գտնվող Ռուսաստանի հայերի միության և Համաշխարհային հայկական կոնգրեսի նախագահ Արա Աբրահամյանը, ելույթ ունենալով «Երեկոն Մայք Սարյանի հետ» հեռուստածրագրի ժամանակ: