Նոր սերնդի ՀԴՄ-ները հունվարի 1-ից պարտադիր են դարձել
2019 թվականից բոլոր տնտեսավարող սուբյեկտները պարտադիր պետք է նոր սերնդի ՀԴՄ-ներով աշխատեն: Սա սահմանված է ՀՀ հարկային օրենսգրքի 457-րդ հոդվածի 5-րդ մասով: Նշենք, որ նոր սերնդի ՀԴՄ-ների ձեռք բերման և տեղադրման գործընթացն իրականացվել է փուլերով: Առաջին փուլում նոր ՀԴՄ-ները ձեռք էին բերել խոշոր բիզնեսի ներկայացուցիչները, այնուհետև միջինները: Այս տարվա հունվարի մեկը վերջնաժամկետ է համարվում, և բոլոր տնտեսվարողները պետք է ունենան այդ ՀԴՄ-ներից: Նախորդ տարեվերջին Պետական եկամուտների կոմիտեն նախազգուշացնող հայտարարություն էր տարածել: Ըստ հայտարարության՝ ՊԵԿ-ը հարկային վարչարարություն չի իրականացնի այն հարկ վճարողների նկատմամբ, որոնք կներկայացնեն նոր սերնդի ՀԴՄ-ների ձեռքբերման դիմումներ: «Կասեցում» քաղաքացիական նախաձեռնության համակարգող, գործարար Սամսոն Գրիգորյանը Lragir.am-ի հետ զրույցում ասաց, որ հիմնականում միկրոբիզնեսի ներկայացուցիչները չունեն նոր սերնդի ՀԴՄ-ներ: «Մեր դիտարկումներով՝ միջին բիզնեսի ներկայացուցիչներն արդեն ունեն այդ ՀԴՄ-ները, միկրո բիզնեսի ներկայացուցիչները, հիմնականում առևտրականները չունեն: Իսկ 2019 թվականի հունվարի մեկից արդեն պարտադիր է նոր ՀԴՄ-ների կիրառումը: ՊԵԿ-ը հնարավորություն է տվել, որ կարող են գոնե այդ ՀԴՄ-ների ձեռքբերման դիմումը տված լինել: Այսինքն՝ պարտադիր չէ այսօր այդ ՀԴՄ-ները տեղադրած լինեն, գոնե դիմումը պետք է տված լինեն: Կարծում եմ՝ դա ՀԴՄ-ների սահմանափակ քանակի հետ է կապված: Ով դիմումը տված լինի, չի տուգանվի: Իսկ եթե ստուգում լինի և հայտնաբերվի, որ դեռևս հին ՀԴՄ-ով են աշխատում, առաջին անգամ լինելու է նախազգուշացում, տուգանքներ չեն լինի: Դա եզրակացնում ենք ՊԵԿ հայտարարության հիման վրա»,- ասաց Սամսոն Գրիգորյանը: Նա նշեց, որ տոնական ու ոչ աշխատանքային օրերին տուգանքների ու ստուգումների մասին ահանզագեր չեն ստացվել տնտեսվարողներից: «Իսկ վաղվանից, երբ աշխատանքային կլինի, կարծում եմ, արդեն ստուգումները կսկսվեն: Ամեն դեպքում, մենք մեր կողմից իրազեկել ենք, որ գոնե տնտեսվարողները դիմումները ներկայացնեն»,- հավելեց նա: Նշենք, որ նոր սերնդի ՀԴՄ-ները նախկինում տնտեսավարողները ձեռք են բերել 160 հազար դրամով: Համացանցում այս օրերին դժգոհություններ էին հնչում այն մասին, որ իրականում այդ ՀԴՄ-ների գինը 60-80 դոլար է, ինչո՞ւ տնտեսվարողներին հնարավորություն չեն տալիս իրենց ճանապարհներով ձեռք բերել այդ սարքերը: Նյութն ամբողջությամբ` սկզբնաղբյուր կայքում
Հետևեք մեզ Viber-ում
