Հայրիկյան VS Փաշինյան

ՄԱՍ Ա․ Այսօր շատ է խօսւում Նիկոլ Փաշինեանից 8-9 ամիսների կտրուածքով ակնկալիքները չափազանցելու մասին։ Ընդգծւում է, թէ դա շատ կարճ ժամանակ է։ Դրա հետ կապուած ակամայ զուգահեռներ անցկացրի իմ անցեալ գործունէութեան վճռական փուլերի հետ։ Եւ ով զարմանք՝ դրանք հենց 8-9 ամիսների են վերաբերել։ Ժամանակահատուած որի ընթացքում ես իշխանութեան նուազագոյն լծակներ իս չեմ ունեցել, այլ ընդհակառակը։ 1968 թուականի յուլիս․․․ (Այն ժամանակ դեռեւս չէին ծնուել այսօր հակադրուողների հիմնական մասը, աւելին՝ նրանց ծնողները դեռ մանկապարտեզ էին գնում։ Դա ոչ միայն չի նսեմացնում որեւէ մէկի այլ ընդհակառակը, տալիս է առաւելութիւն՝ իրենից առաջ եղած երեւոյթների գնահատականը սեփական իմացապաշարի մաս դարձնելու։) 1968 թ․-ի յուլիսին կալանաւորուեցին Ազգային Միացեալ Կուսակցութեան (ԱՄԿ) ղեկավարն ու նրա երկու օգնականները։ Նրանից մէկ շաբաթ առաջ կալանաւորուել էին ԱՄԿ-ի հետ կապուած ՅԱՆՈՒՆ ՀԱՅՐԵՆԻՔԻ կազմակերպութեան 8 անդամներ։ Կոմունիստական գաղտնի ծառայութիւնը «փայլուն» արդիւնք էր արձանագրել՝ վերացուել էր մի շատ վտանգաւոր կազմակերպութիւն։ 1967 թուականի գարնանից ես գլխաւորում էի ԱՄԿ երիտասարդական կառոյցները (ՀԵՄ, ՇԱՆԹ, ապա ԵՐԿՈՒՆՔ, ՑԱՍՈՒՄ, ԱՅԳ, ՀԱՅՈՒՀԻ)։ Այդ փուլում մեր ամենաաղմկօտ եւ յայտնի գործը Ծիծեռնակաբերդում կազմակերպած ռադիովհաղորդումն էր։ ԱՄԿ հիմնադիրների կալանաւորումից յետոյ 1968 թ․-ի ամռանը շարունակելով եւ աւելի թափ հաղորդելով մեր կառոյցների գործունէութեանը ես ԱԿԱՄԱՅ՝ ինձնից անկախ դարձայ ԱՄԿ հիմնական դէմքը։ Այդ ժամանակ 19 տարեկան էի։ Կալանաւորուեցի 1969 թ.-ի մարտի վերջին՝ 8-9 ամիս անց, սակայն այդ կալանաւորումով արձանագրուեց ԱՄԿ գործունէութեան շարունակականութիւնը, որը նոր որակ էր նախանշում հայ (եւ ոչ միայն հայ) քաղաքական կեանքում։ Հիմնականում ԵՐԿՈՒՆՔ թերթիկի տպագրութեան համար (նշանաբանն էր՝ ՄԱՀ ԿԱՄ ԱԶԱՏ ՀԱՅԱՍՏԱՆ, տպաքանակը 5000) ինձ դատապարտեցին 4 տարուայ իսկ 4 ընկերներիս (հիմա բոլորն էլ երջանկայիշատակ)՝ վեց ամսից 2 տարուայ ազատազրկման (շարունակելի)։ Գրել է Պարույր Հայրիկյանը