«Իմ քայլը» խմբակցության առաջին նիստի օրը հայտնի է

ԱԺ «Իմ քայլը» խմբակցության առաջին նիստը, ամենայն հավանականությամբ, տեղի կունենա հունվարի 14-ին։ Այս մասին News.am-ի հետ զրույցում ասաց «Քաղաքացիական պայմանագիր» կուսակցության մամուլի խոսնակ Վահան Կոստանյանը։ «Խմբակցության քարտուղար կլինի Հակոբ Սիմիդյանը, հանձնաժողովների նախագահների, փոխնախագահների անունները դեռ քննարկվում են։ ԵԽԽՎ պատվիրակության կազմն էլ պատրաստ կլինի հունվարի 15-ին, որպեսզի 16-ին պատվիրակության անդամների անունները ուղարկվեն ԵԽԽՎ»,– ասաց Կոստանյանը։ Կոստանյանի խոսքով՝ հունվարի 10-ին մանդատները պաշտոնապես ստանալուց հետո մինչեւ առաջին նիստը բոլոր հարցերի պատասխանները կլինեն։ Նշենք, որ 7-րդ գումարման Ազգային Ժողովի պատգամավորները մանդատները կստանան հունվարի 10–ին։ 7-րդ գումարման ԱԺ–ն ունի 132 պատգամավոր, որից 88 մանդատը պատկանում է «Իմ քայլը» դաշինքին, 26-ը՝ ԲՀԿ–ին, 18-ը՝ «Լուսավոր Հայաստան» կուսակցությանը։ ԱԺ առաջին նիստը նախատեսված է հունվարի 14-ին՝ երկուշաբթի, ժամը 10։00-ին։