Գործառույթների վերանայում, կառույցի վերակառուցում պետք է լիներ. Գրիգոր Ամիրզայանը՝ Սփյուռք նախարարության լուծարան մասին
Ֆրանսիայում «Արմենիա» միության նախագահ Գրիգոր Ամիրզայանի խոսքով՝ Սփյուռքի նախարարության լուծարման մասին նախագիծն անհանգստացնում է իրեն, որովհետև կառույցը, ըստ նրա, ամուր կապ էր ստեղծում Հայաստանի և այլ երկրներում հայկական գաղութների, այնտեղ եղած կազմակերպությունների միջև: Նա Tert.am-ի հետ զրույցում անդրադարձավ նախորդ տարվանից շրջանառվող նոր իշխանությունների նախագծին, ըստ որի, օպտիմալացման արդյունքում, սփյուռքի նախարարությունը պետք է լուծարվի: «Հավատացեք, որ սփյուռքը Հայաստանի հյուպատոսությունների, դեսպանությունների գործառույթը կատարող կառույց է: Քանի որ Հայաստանը դեռ նոր անկախացած երկիր է և շատ ռեսուրսներ էլ չունի, Սփյուռքի նախարարությունն է, որ այդ դերը կստանձնի, - ասաց նա՝ նաև հավելելով, որ սփյուռքի միջոցով Հայաստանի հետ զբոսաշրջային կապերն էլ է լինում զարգացնել, - շատերը չգիտեն, թե ինչպես Հայաստան գան, ինչ կտենսնեն այնտեղ, ինչ լեզվով պետք է խոսեն: Ես անձամբ Ֆրանսիայում շատերին եմ դա ներկայացնում: Նույնիսկ շատ սփյուռքահայեր շատ բաներ չգիտեն Հայաստանի մասին»: Գրիգոր Ամիրզայանը համաձայնեց այն տեսակետների հետ, ըստ որոնց, պետք է գոնե Սփյուռքի նախարարության լուծարման հարցը քննարկել սփյուռքի հետ: «Մենք չենք ցանկանում խառնվել Հայաստանի ներքին կյանքին: Հայաստանի քաղաքացին իր ներիքն հարցերն ունի, խնդիրներն ունի, բայց գոնե այս հարցում սփյուռքի կարծիքը հաշվի առնելու կարիք կար: Պետք է պարզապես դիմեր սփյուռքին՝ հասկանալու համար՝ ինչպես բարելավել Հայաստան-սփյուռք հարաբերությունները, - ասաց նա՝ նշելով, որ սփյուռքը նաև Հայաստանին կարող է օգնել ռեսուրսներ և ֆինանսներ տրամադրելով, - պետք է պարզապես հասկանալ, թե ինչպես ավելի արդյունավետ դարձնել այդ հարաբերությունները»:
Նա նկատեց, որ չնայած դժբախտության հետևանքով ստեղծվեց սփյուռքը, բայց այնուամենայնիվ, հիմա բարեբախտություն է Հայաստանի համար ունենալ այն: «Ադրբեջանը հիմա նախանձում է Հայաստանին», - ասաց նա: Գրիգոր Ամիրզայանի խոսքով՝ նախորդ և ներկայիս իշխանությունների օրոք էլ գործող սփյուռքի նախարարությունն արդարացնում էր սփյուռքի սպասումները: Նրա խոսքով՝ դժվար կլինի առանց այդ կառույցի սփյուռքի և Հայաստանի միջև կապ ահովելը: Նա նաև նկատեց, որ շատ քչերը սփյուռքում կհետևեն այսօրվա իշխանությունների հորդորին, որ առանց միջնորդությունների կապ հաստատեն Հայաստանի հետ: «Կարծում եմ՝ լուծարումը շատ վատ բան է: Գործառույթների վերանայում, կառույցի վերակառուցում պետք է լիներ: Հայաստանը բացառիկ երկիր, որն ունի սփյուռք, և դրա շնորհիվ է նաև, որ կարողանում է եվրոպական մեծ երկրների հետ հարաբերությունները զարգացնել: Եթե մեկ կառույց չլինի սփյուռքահայերի համար, ապա միավորող չի լինի, սփյուռքը կցրվի», - ասաց նա:
Հետևեք մեզ Viber-ում
