Երևանում թալանել են ՀՀ Հաշվեքննիչ պալատի վարչության պետի և «Կոնվերս բանկի» վարկային մասնագետի ավտոմեքենաները

SHAMSHYAN.com-ի տեղեկություններով, երեկ՝ դեկտեմբերի 29-ին, թալանել են Երևան քաղաքի բնակիչ, 40-ամյա Կարեն Առուստամյանին պատկանող Mercedes մակնիշի 17 ՍՍ 007 համարանիշի ավտոմեքենան: Ինչպես հայտնում է ֆոտոլրագրող Գագիկ Շամշյանը, ավտոմեքենան կայանված է եղել Բաղրամյան պողոտայի թիվ 4 հասցեի դիմաց, իսկ նրա միջից անհայտ անձը կամ անձինք գողացել են պայուսակը, որի մեջ եղել է Կ. Առուստամյանի աշխատանքային վկայականը, 2 հատ «IQOS» ապրանքանիշի տաքացվող ծխախոտի համակարգ, տան և աշխատասենյակի բանալիներ, բջջային քարտեր, գումար և այլ իրեր: Կատարվածի մասին Կ. Առուստամյանը ահազանգել է ոստիկանության Արաբկիրի բաժին, որտեղից ժամանել է օպերատիվ խումբը՝ հետաքննչական բաժանմունքի հետաքննիչի գլխավորությամբ: Փաստի առթիվ ոստիկանության Արաբկիրի բաժնի հետաքննչական բաժանմունքում նյութեր են նախապատրաստվում: Գ. Շամշյանի տեղեկություններով, Կ. Առուստամյանը աշխատում է ՀՀ Հաշվեքննիչ պալատի մեթոդաբանության, վերլուծության և միջազգային կապերի վարչության պետ: Ֆոտոլրագրողի տեղեկություններով, երեկ ոստիկանության Նոր-Նորքի բաժին էր դիմել Երևան քաղաքի Նոր-Նորք վարչական շրջանի բնակիչ, 26-ամյա Էդգար Խաչատրյանը և հայտնել, որ դեկտեմբերի 29-ին, ժամը 00:30-ից մինչև 04:30-ն ընկած ժամանակահատվածում անհայտ անձը կամ անձինք Վիլնյուսի փողոցում կայանված, իրեն պատկանող Toyota մակնիշի 02 ՕՕ 092 համարանիշի ավտոմեքենայի վրայից գողացել են բոլոր անիվները և պտուտակները, ինչի պատճառով նա կրել է 250 հազ. դրամի վնաս: Այս գողության փաստով ոստիկանության Նոր-Նորքի բաժնի հետաքննչական բաժանմունքում հետաքննություն է սկսվել: Գ. Շամշյանի տեղեկություններով, Է. Խաչատրյանը աշխատում է «Կոնվերս Բանկ» ՓԲԸ-ում՝ որպես վարկային մասնագետ: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: Լուսանկարում՝ ՀՀ Հաշվեքննիչ պալատի մեթոդաբանության, վերլուծության և միջազգային կապերի վարչության պետ Կարեն Առուստամյանն է