«Արդյոք նորմա՞լ է, որ ավագանու անդամը ավագանու մյուս անդամին «ծիտ» է անվանում»
Երևանի քաղաքապետ Հայկ Մարությանը դեկտեմբերի 25-ին լրագրողների հետ ճեպազրույցում անդրադարձավ Ավագանու նիստում տեղի ունեցած միջադեպին: Հարցին, թե այսօր մոտավորապես տեսանք այն, ինչի ականատես էինք լինում «Հանրապետական»-ի, «Ելք»-ի և «Երկիր Ծիրանի»-ի բանավեճի ժամանակ: Մարությանը նշել է, որ ինքը նման բան չի նկատել. «Ես տեսա դրա լրիվ հակառակ պատկերը՝ նորմալ քննարկում էր, նորմալ բանավեճ: Այս բանավեճերը տեղի են ունենում և՛ հանձնաժողովների նիստերի ժամանակ, և՛ ցանկացած քննարկումների»: Լրագրողի դիտարկմանը, թե արդյոք նորմա՞լ է համարում, որ ավագանու անդամն ավագանու մյուս անդամին «ծիտ» է անվանում, Մարությանն ասել է, որ ինքը չի լսել այդպիսի բան, եթե լսի՝ կպատասխանի: Հարցին, թե խոսելով Ավագանու անդամների` 55 հազար դրամ աշխատավարձ ստանալու և չաշխատելու մասին, Մարությանն արդյոք գիծ չի քաշում իրենց միջև, քաղաքապետը պատասխանեց. «Գիծ են քաշում այն ժամանակ, երբ դուրս են գալիս ելույթ ունենալու, 100 տոկոսանոց սուտ են ասում, դրա վրա ուզում են դիվիդենտներ հավաքել»:
Հետևեք մեզ Viber-ում
