Շանթն արժանի չէր, իսկ գողականին դա շնորհեցին

Երեւանի ընդհանուր իրավասության դատարանի Շենգավիթի նստավայրում երեկ հրապարակվեց հայտնի քրեական հեղինակություն Ալիկ Բանդուրյանի՝ Նորատուսցի Ալիկի դատավճիռը։ Չարբախում երկու անձի աղմկահարույց սպանության գործով անցնող ամբաստանյալ Նորատուսցի Ալիկն արդարացվեց և ազատ արձակվեց դատական նիստերի դահլիճից։ Նրա հանզակիցներ Չարբախցի Գեղամ մականունով հայտնի Պետրոս Իսրայելյանը դատապարտվեց 4 տարվա ազատազրկման, սակայն համաներմամբ ազատվեց պատժի կողմից, իսկ Բդո մականվամբ հայտնի Արմեն Գասպարյանը նույնպես ազատ արձակվեց։ Հիշեցնենք, որ 2016 թ. նոյեմբերի 13-ին Չարբախում գործող «Լիա» գեղեցկության սրահի նկուղային հարկում կրակոցներ էին հնչել, որի հետեւանքով 25-ամյա Գեւորգ Ավետիսյանը տեղում մահացել էր, իսկ հրազենային վիրավորում ստացած 35-ամյա Արամ Պետրոսյանն ու 38-ամյա Մուշեղ Մուշեղյանը տեղափոխվել էին «Սուրբ Աստվածամայր» բժշկական կենտրոն, որտեղ եւ Մուշեղ Մուշեղյանը մահացել էր: Հենց այս գործով էին անցնում հիշատակված անձինք, իսկ Նորատուսցին համարվում էր սպանության պատվիրատուն ու դատապարտվել էր ութ տարվա ազատազարկմամբ։ Աղմկահարույց սպանության գործով անցնող քրեական հեղինակություններին ազատ արձակելու դատարանի որոշումը մի շարք հարցեր է առաջ բերել՝ այդ ինչպես եւ ինչու նախկին իշխանության սպասարկու քրեական տարրը արդարացվեց, իսկ Շանթ Հարությունյանը, որն արժեքների հեղափոխություն էր փորձում իրականացնել, բայց իր դատաստանն էր տեսնում նախկին իշխանության ձեռամբ, հեղափոխական իշխանությունից այդպես էլ չստացավ արդարացման դատավճիռ ու ազատ արձակվեց համաներմամբ։ Նորատուսցին ազատ արձակվելուց հետո հայտարարել է՝ «Մալադեց Նիկոլ Փաշինյանին»։ Այսօր արդեն տեղեկություններ կան, որ քրեական հեղինակության արդարացման գործում մեծ է եղել իշխանության ներկայացուցիչ, ԱԺ պատգամավոր Սասուն Միքայելյանի դերը։ Վերջինս դեռեւս տարեսզկբին էր նախաձեռնել ստորագրահավաք, որպեսզի փոխվեր Ալիկ Բանդուրյանի կալանքը եւ նա ազատ արձակվեր։ Մարտունիում Փաշինյանը հրապարակում ելույթ ունենալիս հայտարարեց, որ Նորատուս գյուղի տարածքում նկատել է աղբի հսկայական կույտեր, որից սարսափել է: Հարցին՝ ինչու՞ չեն հեռացնում աղբը, համայնքապետը եւ մարզպետարանի աշխատակիցները ասել էին, որ որեւէ մեկը չի համարձակվում խնդրի վերացման մասին ասել քրեական հեղինակության ընտանիքին: «Հասա Նորատուսի խաչմերուկ, պատուհանից նայեցի, մի ակնթարթ տեւեց, բայց ես սարսափեցի, որովհետեւ էնտեղ երկու հատ հսկայական խանութ կա եւ դրանից 10 մետր էն կողմ էդ խանութների չափ աղբակույտ կա: Այնպիսի տպավորություն է, որ այդտեղ գյուղապետ չկա, որ սեփականատեր չկա. ո՞ւր է նայում մարզպետարանը։ Այնպիսի տպավորություն է, որ այս երկրում ոչ մի բան չի փոխվել, որովհետեւ այդ թափված աղբը անարգանք է մեզնից յուրաքանչյուրի նկատմամբ»,- բարկացած հայտարարել էր Փաշինյանը։ Մնում է պարզել՝ գուցե իշխանությունն էլ է վախեցել ու արդարացրել Բանդուրյանին։ Անի Սահակյան