Ով է որոշում ՀԱՊԿ գլխավոր քարտուղարի թեկնածության հարցը.պարզաբանում է դեսպանը

  «Հայաստանը մտնում է զարգացման նոր փուլ:  Կցանկանայի բարեկամական հայ ժողովրդին մաղթել, որ զարգացման այն նոր փուլը բերի կայունություն, երկրի առաջ ծառացած խնդիրների լուծում:Ռուսաստանն աջակցում է Հայաստանին խնդիրների կարգավորման հարցում »,-   լրագրողների հետ զրույցում ասաց Հայաստանում Ռուսաստանի արտակարգ և լիազոր դեսպան Սերգեյ Կոպիրկինը: «Կանենք մեզնից կախվածը, որ մեր երկկողմանի հարաբերությունները ամրանան ու զարգանան:Հայաստանում տեղի ունեցած իրադարձությունները «չհանգեցրին հայ-ռուսական հարաբերությունների բազային բնույթի փոփոխության, որը դաշնակցային ու գործընկերային է»: Դրա մասին վկայում է քաղաքական համագործակցության ինտենսիվությունը, առևտրային ու տնտեսական հարաբերությունների զարգացումը»,- ասաց Սերգեյ Կոպիրկինը: «Հայաստանից Ռուսաստան արտահանումների թիվն աճել է 30 տոկոսով: Միայն այս տարվա վերջին 9 ամիսներին՝ 15 տոկոսով: Հայաստանի հետ ակտիվ համագործակցել ենք ՀԱՊԿ, ԵԱՏՄ շրջանակներում»,- հավելեց նա: Հարցին՝ Ռուսաստանը «փափուկ քաղաքականություն» կիրառո՞ւմ է հարաբերությունները արդյունավետ դարձնելու համար, դեսպանը պատասխանեց, որ իրենք պետք է ավելի ակտիվ աշխատեն քաղաքացիական հասարակության, մամուլի հետ. «Կարծում եմ, որ արդյունավետությունը «փափուկ քաղաքականության» տեսանկյունից պետք է տեսանելի լինի առաջին հերթին Հայաստանին: Հիմնական ռեսուրսը «փափուկ ուժի» կապերն են, որոնք միավորում են մեր ժողովուրդներին դարերի ընթացքում: Կա հսկայական պոտենցիալ կրթության, մշակույթի ոլորտներում համագործակցելու համար: Բավարարվել նրանով, ինչ կա, թույլատրելի չէ, մենք աշխատում ենք»: Խոսելով ՀԱՊԿ գլխավոր քարտուղարի հարցի մասին՝ Ս. Կոպիրկինն ասաց, որ Ռուսաստանի դիրքորոշումն այս հարցում հետևյալն է՝ Կազմակերպության ամրապնդում, անդամ-պետությունների միջև ներդաշնակություն, ՀԱՊԿ-ից բարձր արդյունավետություն: «ՀԱՊԿ գլխավոր քարտուղարի թեկնածության հարցը լիդերների մակարդակում որոշվում է: Ես կարծում եմ, որ մեր բոլորի հետաքրքրությունը Կազմակերպության ամրապնդումն է»,- նշեց նա: