Մհեր Սեդրակյանն արդեն «ալիբի» ունի

Ազգային ժողովի էթիկայի հարցերի ժամանակավոր հանձնաժողովը մարտի 29-ին քննել է լրագրողական երեք կազմակերպությունների դիմումն ընդդեմ ՀՀԿ խմբակցության պատգամավոր Մհեր Սեդրակյանի՝ Թոխմախի Մհերի: Հիշեցնենք, որ ՀՀԿ-ական Մհեր Սեդրակյանը ԱԺ-ի փետրվարի 19-ի արտահերթ նիստի ժամանակ լրագրողներին «նախիր» էր անվանել, որից հետո հայհոյել էր իրենից պարզաբանում խնդրող լրագրողին: Էթիկայի հանձնաժողովի նիստից հետո ժամանակավոր հանձնաժողովի նախագահ Խոսրով Հարությունյանը լրագրողների հետ զրույցում ասել է, որ այս պահին ըստ էության որևէ հայտարարություն չի անելու: «Մենք նիստի ընթացքում պայմանավորվել ենք, որ հարցի հիմնական զեկուցողը՝ Թևան Պողոսյանը, ինչպես նաև հանձնաժողովի մյուս անդամները հնարավորության սահմաններում շփվեն այն լրագրողների հետ, ովքեր ներկա են գտնվել այդ միջադեպին՝ փորձելով նրանցից հավելյալ տեղեկատվություն ստանալ: Հետագայում արդեն մենք կնախապատրաստենք մեր վերաբերմունքը հարցի նկատմամբ»,-տեղեկացրել է Հարությունյանը: Այսօրվա նիստում լսել են պատգամավորի դեմ հայց ներկայացրած լրագրողներին, իսկ ապրիլի 4-ին ևս մեկ նիստ են հրավիրելու, որի ընթացքում կլսեն պատգամավոր Մհեր Սեդրակյանին: Դժվար է պատկերացնելն անգամ, որ Սեդրակյանն իրեն նման անպատվություն թույլ կտա ու կներկայանա էթիկայի հանձնաժողով, առավել եւս, որ բացատրություններ կտա իր գործողությունների վերաբերյալ։ Ի վերջո, սա ոչ առաջին եւ ոչ էլ վերջին անգամն է։ Հատկապես այսօրվա նիստից հետո Սեդրակյանը որեւէ խնդիր ու պարտավորվածություն չի ունենա հանձնաժողովին բացատրություններ տալու, քանզի պարզ է դարձել, որ ներկա հանձնաժողովականներից միայն մեկն է միջադեպի տեսանյութում ֆիքսել, որ Սեդրակյանը հայհոյել է։ Նիստի ընթացքում հանձնաժողովի անդամները դիտել են միջադեպի տեսանյութը՝ հասկանալու համար՝ իրականում պատգամավորը լրագրողին հայհոյե՞լ է, թե ոչ: Այս հարցի վերաբերյալ Հարությունյանն օրինակ չի ցանկացել կարծիք հայտնել . «Ես հստակ բան կասեմ միայն այն ժամանակ, երբ հարցի վերաբերյալ ըստ էության որոշում լինի»: Նիստին Հարությունյանից բացի մասնակցել են ՀՀԿ-ական Սուքիաս Ավետիսյանը, «Ժառանգություն» խմբակցության պատգամավոր Թևան Պողոսյանը, ԲՀԿ խմբակցության պատգամավոր Վահան Բաբայանը: Գործուղման մեջ գտնվելու պատճառով նիստին չեն մասնակցել ՕԵԿ խմբակցության պատգամավոր Հովհաննես Մարգարյանը և ՀՅԴ խմբակցության պատգամավոր Արմեն Բաբայանը: Նիստին հրավիրվել են լրագրողներ Լիլիթ Լալայանը, Լիլիթ Թադեւոսյանը եւ Փայլակ Ֆահրադյանը: Լիլիթ Լալայանը մի շարք լրատվամիջոցների փոխանցել է, որ հանձնաժողովի անդամները, բացառությամբ Թևան Պողոսյանի, չեն լսել հայհոյանքը. «Տեսանյութը՝ փաստացի հիմքը, նրանք չեն ուզում ընդունել, որովհետև, ըստ նրանց, վիճարկելի է։ Պարոն Հարությունյանն ասաց, թե երկիմաստ է, իմաստ չունի սա դիտարկել և պետք է լրացուցիչ հանգամանքներ ևս ուսումնասիրել, իմանալու արդյոք հայհոյել է, թե՝ ոչ: Իրենք, ըստ էության, այդքան էլ հակված չեն դիմումը բավարարել»,- ասաց նա: Փայլակ Ֆահրադյանն էլ հավելել է .«Չգիտեմ ինչով էր պայմանավորված, չեմ ուզում ասել, որ լսողական խնդիրներ ունեն, բայց կարծում եմ այնուամենայնիվ հստակ հասկանալի է, ինչի մասին է խոսքը,- ասել է նա հավելելով,- Օրինակ՝ Վահան Բաբայնան ասաց, որ դե կարող ա ասում ա՝ գնա գործիդ»: Իհարկե, մյուս կողմից զարմանալի կլիներ, որ ՀՀԿ-ականները «փուռը» տային իրենց կուսակցին մի պարզ պատճառով, որ հայհոյանքն իրենց համար սովորական հաղորդակցության լեզուն է։ Ըստ էության ՀՀԿ-ականների եւ նրանց հարողների հետ ԱԺ օդիոզ պատգամավորնեը եւ նրանց կարկառուն ներկայացուցիչ Մհեր Սեդրակյանը հենց այդ լեզվով են շփվում։ Մեծ հաշվով նրանք արդեն իսկ «ալիբի» են ստեղծել Սեդրակյանի համար։ Անի Սահակյան