Ինչու էր առևանգել EgyptAir-ի ինքնաթիռը. մանրամասներ

Եգիպտացի Սեյֆ ադ-Դին Մուստաֆային, որը երեքշաբթի առևանգել էր եգիպտական EgyptAir ավիաընկերության А320 ինքնաթիռը, որն ուղևորվում էր Ալեքսանդրիայից Կահիրե, 8 օրով կալանավորել են, հայտնում է Cyprus Mail թերթը: Թերթի տեղեկություններով՝ եգիպտացին դատարանում իրեն մենակ է ներկայացրել, առանց փաստաբանի օգնության: Դատական հետաքննության ընթացքում նա հնչեցրել է հանցագործության հիմնական մոտիվները: «Եթե ինչ-որ մեկը չի տեսել իր ընտանիքին 24 տարի, ցանկանում է տեսնել կնոջն ու երեխաներին, իսկ Եգիպտոսի կառավարությունը թույլ չի տալիս դա նրան անել, ապա ինչ պետք է անի այդ իրավիճակում»,- հայտարարել է Մուստաֆան: Նրա հաղորդմամբ՝ Կիպրոսում ապրում են տղամարդու նախկին կինն ու երեք երեխաները: Երեխաներից մեկը 10 տարի առաջ մահացել է: Տեղեկությունների համաձայն՝ տղամարդը 8 օր անցկացնելու է Նիկոսիայի բանտում: