Բաքվի կասկածելի ուրախությունը. երեքժամյա հանդիպման գաղտնիքը
Ղարաբաղյան հարցով բանակցությունները՝ արտգործնախարարների մակարդակով, կշարունակվեն հունվարին, հայտարարել է Ադրբեջանի արտգործնախարար Էլմար Մամեդյարովը օրերս Միլանում Հայաստանի արտգործնախարար Զոհրաբ Մնացականյանի հետ հանդիպումից հետո: «Կարծում եմ, որ բանակցությունները, որոնք շարունակվեցին երեք ժամ, կարևոր և օգտակար էին՝ կողմերի դիրքորոշումներն առավել լավ հասկանալու առումով: Համաձայնություն ձեռք բերվեց շարունակել բանակցությունները նույն ձևաչափով նաև առաջիկայում, ամենայն հավանականությամբ՝ հաջորդ ամիս», - ըստ «Թրենդ» լրատվական գործակալության՝ ասել է Մամեդյարովը: Հայաստանի արտգործնախարարությունը հանդիպման վերաբերյալ հաղորդել է, որ այն ևս «միտված էր առավել հանգամանալից ծանոթանալու խաղաղության գործընթացի վերաբերյալ միմյանց դիրքորոշումներին ու մոտեցումներին»։ «Այս առումով ծավալվել է մտքերի օգտակար փոխանակություն։ Զոհրաբ Մնացականյանն ու Էլմար Մամեդյարովը պայմանավորվել են առաջիկայում շարունակել հանդիպումները՝ պահպանելով ձևավորված դինամիկան», - ասված է Հայաստանի արտաքին քաղաքական գերատեսչության հաղորդագրությունում: Այսպես, Բաքուն փաստում է, երեք ժամ, կարևոր և օգտակար է ունեցել, ավելին՝ փաստում են, որ դրա նպատակը՝ կողմերի դիրքորոշումներն առավել լավ հասկանալու համար է արվում: Ինչո՞վ է պայմանավորված Բաքվի լավատեսությունը... Ի դեպ, Զոհրաբ Մնացականյանի ելույթ ունենալով ԵԱՀԿ 25-րդ նախարարական խորհրդի նիստին՝ ևս անդրադարձել է Մամեդյարովի հետ հանդիպմանը՝ նշելով. «Անշուշտ ոգևորիչ է, որ մեզ հաջողվեց համաձայնության գալ ընդհանուր տեքստի շուրջ: Այն վերահաստատում է Դուշանբեում ձեռք բերված փոխըմբռնումը կյանքի կոչելու կարևորությունը՝ ինտենսիվորեն աշխատելու հակամարտության գոտում լարվածության հետագա թուլացման և ժողովուրդներին խաղաղությանը նախապատրաստելու ուղղությամբ»: Ապա` նա հավելել է. «Խաղաղությանը նպաստող միջավայրն էական նշանակություն ունի բանակցային գործընթացի համար: Այս առնչությամբ նշանակալի ներդրում կլինի Դուշանբեի համաձայնությունների, ինչպես նաև վստահության մեխանիզմների ստեղծման վերաբերյալ նախկինում ձեռք բերված պայմանավորվածությունների իրագործումը»: Պաշտոնական Երևանը, շարունակում է Դուշանբեի «համաձայնությունները» կարևորել, մյուս կողմից՝ դարձյալ ապրիլյան պատերազմից հետո Վիեննայի ու Սանկտ Պետերբուրգի հանդիպումների պայմանավորվածություններին, կարծես, հպանցիկ են անդրադառնում, դրանք՝ հարկ էլ չհամարելով հիշատակել: Այս պայմաններում, բոլորովին էլ տարօրինակ չէ, որ Բաքուն գոհ է ու երջանիկ: Սպասենք հետագա զարգացումներին: Մետաքսյա Շալունց
Հետևեք մեզ Viber-ում
