Նոր մանրամասներ Երևանում՝ «Հայաթ հոթել»-ում, հնչած կրակոցների դեպքից

SHAMSHYAN.com-ի տեղեկություններով՝ Հայաստանի քննչական կոմիտեի Երևանի քաղաքի քննչական վարչության Ավան և Նոր Նորք վարչական շրջանների քննչական բաժնի ավագ քննիչ Ազատ Դանիելյանի որոշմամբ ձերբակալվել է Երևան քաղաքի Գայի պողոտայի բնակիչ Արթուր Նաջարյանը: Ինչպես հայտնում է ֆոտոլրագրող Գագի Շամշյանը, վերջինիս նկատմամբ քրեական գործ է հարուցվել ՀՀ քր օր-ի 104 հոդվածի 1-ին մասի և 235 հոդվածի 1-ին մասի հատկանիշներով: Ֆոտոլրագրողի տեղեկություններով՝ վերջինս ձերբակալվել է դեկտեմբերի 8-ին, գիշերը ժամը 04:00-ի սահմաններում Նոր Նորք վարչական շրջանի Գայի պողոտա 33 հասցեում գործող «Հայաթ հոթել»- ում հնչած կրակոցների և հոթելում հայտնաբերված Գայի պողոտայի բնակիչ, 33-ամյա Անժելա Իսրայելյանի մահվան փաստով հարուցված քրեական գործի շրջանակում: Գ. Շամշյանի տեղեկություններով՝ քննչական մարմինը տեղեկություններ է ստացել, որ Ա. Իսրայելյանն ու Ա. Նաջարյանը, ովքեր գտնվել են քաղաքացիական ամուսնության մեջ, միասին բնակվել են նշված հոթելի համարներից մեկում: Դեկտեմբերի 8-ին նշված հոթելում վերջիներս վիճաբանել են, որի ժամանակ հոթելի մատուցողուհի Մ. Ե.-ն դուրս է եկել և փորձել է օգնություն խնդրել և այդ ժամանակ հոթելի ներսում կրակոցների ձայներ են լսվել, ով ներս է մտել և տեսել Ա. Իսրայելյանին մահացած, իսկ սենյակում էլ «ԱԿՍ» ինքնաձիգն է եղել, որը ոստիկանության Նոր Նորքի բաժնի ծառայողները մեկուսացրել են: Տեղի ունեցածը ինքնասպանություն է, թե սպանություն, դա պարզ կլինի համալիր մի շարք փորձաքննություններ կատարելուց հետո: Ինչպես ավելի վաղ դեպքի վայրից հայտնել էր ֆոտոլրագրողը, դեկտեմբերի 8-ին առեղծվածային դեպք էր տեղի ունեցել Երևանում։ Ժամը 04։00-ի սահմաններում Երևանի 1-03 շտապօգնության բժիշկների հերթապահ խումբն ահազանգել էր Ոստիկանության Երևան քաղաքի վարչության օպերատիվ կառավարման կենտրոն և հայտնել, որ կանչով մեկնել է Նոր Նորք վարչական շրջանի Գայի պողոտայի վերջնամասում՝ ժողովրդին հայտնի «քանդված կամրջի» հարևանությամբ գործող «Հայաթ հոթել», որտեղ սենյակներից մեկում, հատակին հայտնաբերվել է կնոջ դի։ Օպերատիվորեն դեպքի վայր էր ժամանել Ոստիկանության Երևան քաղաքի վարչության օպերատիվ խումբը՝ վարչության պետ, Ոստիկանության գնդապետ Գարիկ Ղուկասյանի, նույն վարչության քրեական հետախուզության բաժնի պետ, Ոստիկանության փոխգնդապետ Կարեն Բունիաթյանի գլխավորությամբ։ Ժամանել էր նաև Ոստիկանության Նոր Նորքի բաժնի օպերատիվ խումբը՝ բաժնի պետ Հայկ Թումանյանի գլխավորությամբ։ Ոստիկանները նշված հոթելի առաջին հարկում հայտնաբերել էին Երևան քաղաքի Նոր Նորք վարչական շրջանի բնակիչ՝ 33-ամյա Անժելա Ի.-ի դին։ Դատաբժշկի նախնական եզրակացության համաձայն՝ վերջինը մահացել էր ծնոտի մասում ստացած հրազենային վնասվածքից։ Դեպքի վայր էր ժամանել Հայաստանի քննչական կոմիտեի Երևան քաղաքի քննչական վարչության Ավան և Նոր Նորք վարչական շրջանների քննչական բաժնի խումբը՝ բաժնի պետ, արդարադատության գնդապետ Վարդան Ավագյանի, բաժնի պետի տեղակալ, արդարադատության գնդապետ Վահե Լաչինյանի գլխավորությամբ։ Դեպքի վայր էին ժամանել նաև Ոստիկանության Երևան քաղաքի վարչության ՊՊԾ գնդի 3-րդ հատուկ գումարտակի ծառայողները՝ գումարտակի հրամանատար Հայկազ Ջոմարդյանի և նույն գումարտակի 1-ին վաշտի հրամանատար Միքայել Այվազյանի գլխավորությամբ։ Մինչ ոստիկաններն ու քննիչները դեպքի վայրի զննություն էին կատարում, ժամը 04։50-ի սահմաններում «Սուրբ Գրիգոր Լուսավորիչ» բժշկական կենտրոնից Ոստիկանության Նոր Նորքի բաժին ահազանգ է ստացվում, որ «աջ արմնկային շրջանի ծակած վերք» ախտորոշմամբ իրենց մոտ էր տեղափոխվել մի քաղաքացի։ Ոստիկաններն ու քննիչները պարզել էին, որ այդ քաղաքացին Երևան քաղաքի Նոր Նորք վարչական շրջանի բնակիչ՝ 33-ամյա Արթուր Ն.-ն էր, ով հիվանդանոց էր տեղափոխվել նշված հոթելից։ Ոստիկաններն ու քննիչները նշված հյուրանոցային համալիրում հայտնաբերել էին «ԱԿՍ» տեսակի 5.45 մմ տրամաչափի հրազեն, 4 հատ կրակված և 1 հատ չկրակված պարկուճ և 2 հատ դանակ, որոնցից մեկը՝ խոհանոցային։ Ֆոտոլրագրողը հայտնում էր նաև, որ առաջին հարկի մի քանի սենյակներում՝ թե հատակին, թե պատերին, արնանման հետքեր էին, իսկ այն սենյակում, որտեղ հայտնաբերվել էր դին, պատերին առկա էր կրակոցի հետքեր։ Փաստի առթիվ Հայաստանի քննչական կոմիտեի Երևան քաղաքի քննչական վարչության Ավան և Նոր Նորք վարչական շրջանների քննչական բաժնի պետ Վ. Ավագյանի որոշմամբ ստեղծվել է քննչական խումբ՝ նույն բաժնի ավագ քննիչ Ազատ Դանիելյանի գլխավորությամբ, ում կողմից փաստի առթիվ նյութեր են նախապատրաստվում։ Ըստ նախնական տեղեկությունների՝ տեղի ունեցածը ինքնասպանություն է եղել, որը պարզ կլինի մի շարք փորձաքննություններ կատարելուց հետո։ Դեպքի վայրում հավաքվածներն ասում էին, որ մահացածը նշված հոթելի տնօրենն էր։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: Լուսանկարները և տեսանյութը՝ Գագիկ Շամշյանի