Սպիտակի ընտրատեղամասերից մեկում քվեաթերթիկների կապոցի միջից բացակայել է ՀՀԿ քվեաթերթիկը

168.am-ի խմբագրություն էին զանգահարել Սպիտակ քաղաքի թիվ 2 դպրոցում տեղակայված ընտրատեղամասի ընտրողները։ Նրանք ահազանգում էին, որ մի շարք քաղաքացիներ քվեաթերթիկների կապոցը վերցնելիս զարմանքով նկատել են, որ դրա մեջ բացակայում է Հայաստանի հանրապետական կուսակցության (ՀՀԿ) քվեաթերթիկը։ Խմբագրություն զանգահարած ընտրողներն ասացին, որ միայն իրենց բողոքից հետո էին ընտրատեղամասային հանձնաժողովի նախագահն ու քարտուղարը տալիս ՀՀԿ քվեաթերթիկը, այսինքն՝ ՀՀԿ քվեաթերթիկը դիտավորյալ չեն տվել։ Քաղաքացիները կարծում են, որ սա ուղղորդման ակնհայտ փորձ է, և, բացի դրանից, հանձնաժողովականներին հնարավորություն է տալիս բացահայտել ՀՀԿ-ին ընտրողներին։ Նրանք մտավախություն ունեին, որ այդ փաստը հետագայում կարող է օգտագործվել իրենց դեմ։