Մոնտաժել, հանել են.ԱԱԾ տնօրենը՝ իր և վարչապետի գաղտնալսված հեռախոսազրույցի մասին

  «Գաղտնալսված խոսակցության մեջ մոնտաժվել, հանվել են այն մասերը, որոնք ձեռնտու չեն գաղտնալսողներին:Գաղտնալսման տեքստը բոլորդ լսել եք, գիտեք: Մասամբ մոնտաժված է: այսինքն մոնտաժված է այնքանով, որ այն մասերը, որ ձեռք չի տալիս գաղտնալսողին, հանված է: Այստեղ կարևոր հանգամանք կա, վարչապետն ասաց՝ ապահովիր դատարանի անկախությունը, որ ոչ մեկ դատարանի վրա ճնշում չփորձի գործադրել: Սա է եղել վարչապետի ասածը»,-  քվերակությունից հետո լրագրողների հետ զրույցում ասաց Ազգային անվտանգության ծառայության տնօրեն Արթուր Վանեցյանը՝ խոսելով իր և վարչապետի հեռախոսազրուցի մասին, որի գաղտնալսման ձայնագրությունը հայտնվել էր համացանցում: «Չեմ  արել որևէ բան, ինչի համար կարող եմ ամաչել:   Կա գաղտնալսում, կա իմ խոսակցությունը: Ես որևէ բան չեմ արել, որից երբևիցե կամաչեմ որպես ԱԱԾ տնօրեն, ես չեմ արել այնպիսի բան, որի համար կամաչի իմ ընտանիքը կամ ես պարզ երեսով չեմ կարող նայել հասարակության կամ ժոովրդի աչքերին: Ինչ եղել, եղել է, ես չեմ կարծում, թե սարսափելի բան կա: Ժամանակն ամեն ինչ իր տեղը կդնի»,-ասաց նա: Արթուր Վանեցյանը նշեց, իր բջջային հեռախոսը ուղարկվել է անկախ փորձագիտական մարմնի, որը իրականացրել է հեռախոսի վերածանումը: «Հատուկ ծրագրով վերականգնվել են բոլոր հավելվածների՝ viber, whatsapp և մյուս հավելվածների գրագրությունը: Անգամ իմ անձնական գրագրությունը կնոջս հետ քրեական գործերում կա: Իմ հեռախոսը հանձնվել է փորձագիտական մարմնին քննչական մարմնի պահանջով և ամբողջությամբ վերծանվել է»,- ասաց նա: «Այնպես մի գնահատեք, որ եթե հեռախոսը գաղտնալսեցին, ուրեմն ազգային անվտանգության սպառնալիք կա: Այսօրվա զարգացած տեխնիկայի պարագայում Մերկելին էլ են լսել, Չինաստանի ղեկավարին էլ են լսել, մի մասին էլ լսել են, չեն ասել: Ազգային անվտանգության սպառնալիք կլինի, եթե մեր սահմաններին անհանգիստ լինի, եթե պատերազմական գործողությունների նախապատրաստում լինի, ինչի մասին մենք չիմանանք»,-անդրադառնալով այն հարցին, որ ԱԱԾ տնօրենի հեռախոսազրույցի գաղտնալսումը կարող է դիտվել որպես ազգային անվտանգության սպառնալիք, նշեց Վանեցյանը: