Թալանել են «Իմ քայլը» դաշինքի պատգամավորի թեկնածուի բնակարանը

Թալանել են «Իմ քայլը» դաշինքի ռեյտինգային ցուցակով առաջադրված պատգամավորի թեկնածու, գրող Համբարձում Համբարձումյանի և արձակագիր Արփի Ոսկանյանի բնակարանը: Այս մասին տեղեկացանք Արփի Ոսկանյանի Facebook-ի իր էջում արված գրառումից: «Էսօր (երեկ-խմբ.), երբ քարոզարշավի էինք, մտել են մեր տուն, գողացել են իմ ու Համբարձումի նոթբուքները, որոնց մեջ մեր ամբողջ գրական ժառանգությունն էր, տեսախցիկը, իմ երեք ոսկե մատանին, Համբարձումի կնունքի խաչը, տան փողը, որով պիտի ապրեինք մինչև ամսվա վերջ և Համբարձումի անձնագիրը։ Էդ ա՝ ինքն իրան չի ընտրի, մի ձայն քիչ կստանա։ Լավն էին առաջվա գողերը, մտնում էին հայ գրողի տուն, ասենք՝ Րաֆֆու, փող էին թողնում սեղանին, դուրս գալիս։ Ժամանակներ, բարքեր… Ոչ գրողն ա առաջվանը, ոչ գողը»: