Քանի տոկոս ձայն կստանան քաղաքական ուժերը

«GALLUP International association»- ը  դեկտեմբերի 1-ից 4-ն «Նախընտրական ճեպընթաց` վերջին կանգառ» խորագրով ուսումնասիրություն է անցկացրել   1100 քաղաքացիների շրջանում: «Արտահերթ խորհրդարանական ընտրությունների անցկացման մասին տեղյակ են հարցվածների 99.5%, ընտրությունների օրը՝ դեկտեմբերի 9, նշել են 91.4%:Ովքեր են մասնակցում խորհրդարանական ընտրություններին, քաղաքացիների 86.6%-ը նշել է «Իմ քայլին», 63.4%՝ ԲՀԿ-ին, 55.5%՝ ՀՀԿ-ին, ավելի քիչ նշել են ՀՅԴ-ին, «Լուսավոր Հայաստանին», որը սակայն ճանաչողության առումով ամենամեծ աճն է գրանցել»,- լրագրողների հետ հանդիպմանը նշեց «GALLUP International association»-ի Հայաստանում անդամ Էմ Փի ՋԻ ՍՊԸ-Ի տնօրեն Արամ Նավասարդյանը: Քարոզարշավին հետևել է քաղաքացիների 66.8%: Թե ո՞ր ուժի քարոզարշավին են հանդիպել, քաղաքացիների մեծամասնությունը նշել է «Իմ քայլը», ԲՀԿ-ն, «Լուսավոր Հայաստանը», ՀՀԿ-ն, ամենաքիչը քաղաքացիները հանդիպել են «Ազգային առաջընթաց» կուսակցության քարոզարշավին: Քաղաքացիներն առավելապես շատ քարոզարշավին հետևել են հեռուստացույցով, բակերում հանդիպումների, ֆեյսբուքի միջոցով, ընդ որում՝ տպագիր մամուլը ամենաքիչն է: Հարցվածքների 48 %-ը ծանոթացել է նախընտրական ծրագրերին՝ առավելապես «Իմ քայլի», ԲՀԿ-ի և «Լուսավոր Հայաստանի», և ծանոթացել են առավելապես հեռուստացույցով, ամենաքիչը՝ տպագիր մամուլով: Հեռուստաաբանավեճերին քաղաքացիները ևս ամենաշատը հետևել են հեռուստատեսության և կայքերի միջոցով, բայց բանավեճերն առավելապես դրական են գնահատվել: «Մեր կանխատեսումով՝ քաղաքացիների շուրջ 70%-ն է մասնակցելու ընտրություններին:«Իմ քայլ»՝ 69.4 %, ԲՀԿ՝ 5.7%, «Լուսավոր Հայաստան»՝ 3.8 %, «Սասնա ծռեր»՝ 1.4%, ՀՀԿ՝ 1.3%, ՀՅԴ՝ 1.2%, ՄԵՆՔ՝ 0.8%, ՕԵԿ՝ 0.4%, ՔՈ՝ 0.3%, «Ազգային առաջընթաց»՝ 0.1%, Քրիստոնեադեմոկրատական կուսակցություն՝ 0.0%: Հարցվածքների 8.7% հրաժարվել է պատասխանել, 7% դժվարացել է պատասխանել»,- ասաց Ա.Նավասարդյանը: «Թե ռեյտինգային թեկնածուները որքանո՞վ լավ աշխատեցին և որքանո՞վ կկարողանան ավելացնել իրենց կուսակցությունների ցուցանիշները, ցույց կտան ընտրությունների արդյունքները»,- ասաց Ա.Նավասարդյանը՝ հավելելով, որ հաշվի առնելով սխալանքն ու պատասխանել հրաժարվածներին, ապա ԱԺ կանցնեն «Իմ քայլը», ԲՀԿ-ն, ԼՀ-ն, իսկ ՀՀԿ-ի հարցը շատ անորոշ է: Նա նշեց, որ էկզիտ փոլ չեն անցկացնելու: Նրա խոսքով՝ 2012թ. են անցկացրել էկզիտ փոլ և շատ մոտ արդյունք են ստացել, բայց դրանից հետո «Գելափ ինթերնեյշնլը» չի անցկացրել էկզիտ փոլ: Անդրադառնալով երեկվա բանավեճին՝ Ա.Նավասարդյանը նշեց, որ չի կարող, թե դրանք ամենազդեցիկն էին, սակայն ամենակարևորն էին այն առումով, որ առաջին դեմքերն էին մասնակցում և մոտ 3.5 ժամ տևեց: Նրա կարծիքով՝ երեկվա բանավեճը կարող է ազդել, բայց հաշվի առնելով, որ ընդամենը 2 օր է մնացել, ազդեցությունը շատ մեծ չի լինի: