Դեկտեմբերի 9-ին որոշվելու է՝ վերածվելու է ՀՀ-ն միանձնյա բռնապետության, թե ոչ. Վիգեն Սարգսյան

Հանրային հեռուստաընկերության ուղիղ եթերում Հայաստանի Հանրապետական կուսակցության ներկայացուցիչ Վիգեն Սարգսյանը,դիմելով հայրենակիցներին, ասաց ՝այս կիրակի կատարելու ենք ընտրություն, որից կախված է լինելու երկրի ապագան առաջիկա 5 տարիներին և անդին: «Հասարակությունը սևերի և սպիտակների բաժանելու իշխանության քաղաքականությունը ոչ այլ ինչ է, քան ներքին թշնամիներ որոնելու և ստեղծելու և այլակարծությունը խեղդելու միջոց, ով իմ դեմ է, ժողովրդի դեմ է, ով իմ դեմ է, պետության դեմ է, ով իմ դեմ է, հանցագործ է, այս մոտեցումները բնորոշ են բոլոր բռնապետներին:Պոպուլիզմը գաղափարազուրկ կառավարման միջոց է, որը բռնապետություն հաստատելու ամենակարճ և ուղիղ ճանապարհն է:Դեկտեմբերի 9-ին ընտրությունը այդ վտանգը կանխելու, դրան վճռորոշ ոչ ասելու միջոց է»,-ասաց նա: Վիգեն Սարգսյանի խոսքով՝ Նիկոլ Փաշինյանն արդեն իսկ թույլ է տվել կոպտագույն սխալներ: «Դրանք սխալներ են, որոնք խարխլում են պետության հիմքերը, վանում են մեր դաշնակիցներին, ուժեղացնում հակառակորդներին և ուրախացնում թշնամիներին: Փաշինյանը ներկայանում է ընտրողներին ոչ թե քաղաքական թիմով, այլ անձնական նվիրվածության սկզբունքով ձևավորված ցուցակով, որի ներկայացուցիչները մտադիր չեն ամրացնել պետականությունը»,-ասաց նա և նշեց, որ ՀՀ-ում բազմակարծության մթնոլորտը թունավորվել է ու ավելի կսեղմվի, եթե դեկտեմբերի 9-ին չկանխվի: «Այլակարծության և փողոցային բառապաշարը կդառնա դոմինանտ, եթե դեկտեմբերի 9-ին չկանխենք դա»,-ասաց Վիգեն Սարգսյանը, ով նշեց, որ նույնը նաև դատարանների և արդարադատության անկախությանն է վերաբերում, տնտեսության գահավիժմանը: «Դեկտեմբերի 9-ը հին ու նոր իշխանությունների միջև ընտրության օրը չէ, դա յուրաքանչյուր քվեով որոշելու օր է, վերածվելու է ՀՀ-ն միանձնյա բռնապետության, թե կանցնի բարդ, բայց բալանսավորված հակակշիռների համակարգի»,-եզրափակեց նա: