«Միջակ քարոզարշավ է». ֆավորիտները հինգն են
Մեկ շաբաթ հետո Հայաստանում կձևավորվի նոր խորհրդարան, նախքան դա` ներկայացված քաղաքական ուժերը քարոզարշավի ընթացքում ծանոթացնում են ընտրողներին նախընտրական ծրագրերը, երկրի զարգացման իրենց տեսլականը, չնայած` քարոզարշավի ընթացքում ավելի հաճախ փոխադարձ վիրավորանք և մեղադրանք է հնչում , քան` խոսվում է ծրագրերից: Քարոզարաշավի ընթացքի, ուժերի միջև պայքարի և ֆավորիտ ուժերի և այլ հարցերի շուրջ ԼՈՒՐԵՐ.com-ի թղթակիցը զրուցեց քաղաքագետ Արմեն Բադալյանի հետ: -Պարո′ն Բադալյան, մեկ շաբաթից կավարտվի քարոզարշավը: Ինչպե՞ս եք գնահատում դրա ընթացքը -Միջակ քարոզարշավ է, երբ հնարավորությունները տրված են քաղաքական ուժերին` ներկայացնելու իրենց հայեցակարգային մոտեցումները, սակայն հիմնականում մենք տեսնում ենք շատ դեպքերում տրաֆարետ բովանդակություն: Ներկայացվող քաղաքական բովանդակությունները բոլոր ուժերի շատ թույլ են, միջակ են: Ծրագրերը ևս շատ դեպքերում միջակ են, որովհետև կոնցեպտուալ հարցեր չեն քննարկվում, եթե անգամ քննարկվում են, դա ավելի շուտ դեկլարատիվ կամ մեկ-երկու նախադասություն, հիմնականում ոչինչ չասող նախադասություններ են, բայց կոնցեպտուալ հայեցակարգային մոտեցումներ չկան և′ արտաքին քաղաքականության վերաբերյալ, և′ սահմանադրական փոփոխությունների վերաբերյալ, և′ ապագայում տնտեսության զարգացման վերաբերյալ: Ընդամենը նշում են` մենաշնորհ չպետք է լինի, բայց ընդհանուր արդյունաբերության, գյուղատնտեսության զարգացման կոնցեպցիան, էլ չեմ ասում գիտակրթական համակարգի վերաբերյալ հայեցակարգային մոտեցումները չի ներկայացվում, որը կարևորագույն էլեմենտներից մեկն է: -Ինչո՞վ է տարբերվում այս քարոզարշավը նախորդից Հիմնականում նույն քարոզարշավն է, ինչը եղել է նախորդ ժամանակահատվածում. չի տարբերվում, բայց պետք է տարբերվեր, և դա, իմ կարծիքով, բացատրվում է նաև չիմացության արդյունքով, միգուցե մարդիկ 20 տարի սովոր են եղել նմանատիպ քարոզաշավ անցկացնելուն, դրա համար հիմա նույնատիպ քարոզարշավ են իրականցնում` առանց հաշվի առնելու փոփոխությունները. կառավարման համակարգի էությունն է փոխվել, քրեաօլիգարխիկը չկա, ընտրակաշառքը չկա: Սա նշանակում է, որ կուսակցությունները պետք է էլ ավելի հզոր միտք առաջարկեն, բայց չենք տեսնում դա: - Այս ընտրապայքարում, որոնք են Ֆավորիտ ուժերը Վարչապետի պաշտոնակատարի բարձր հեղինակության շնորհիվ, կարող ենք ասել` մեկ ֆավորիտ ուժ կա` «Իմ քայլը» դաշինքը, որն, անկասկած, լինելու է խորհրդարանում, բայց, ամենայն հավանականությամբ, ավելի քիչ ձայն է հավաքելու, քան Երևանի ավագանու ընտրությունների ժամանակ. դա մոտավորապես տեսանելի է: Երկրորդ, ամենայն հավանականությամբ, կանցնի նաև ԲՀԿ-ն, իհարկե շատ ավելի քիչ` քան ուներ նախկինում, բայց, այնուամենայնիվ, նա կանցնի: Երրորդ, չորրորդի հետ կապված բարդություններ կան, հնարավոր է` անցնեն «Լուսավոր Հայաստան», «Սասնա Ծռեր, կամ «Հանրապետական» կուսակցությունները. դա այս պահին կանխատեսելի չէ: ՀՀԿ-ի անցնելու հավանակնությունը քիչ է, բայց բացառված չէ: -Երկու քաղաքական ուժերի` «Իմ քայլի» և ՀՀԿ-ի միջև կարծես «մարտ» ընթանա: Արդյո՞ք ՀՀԿ-ի կողմից իրականացվող քարոզարշավի մեթոդը` հոլովակների պատրաստումը, կազդի Նիկոլ Փաշինյանի վարկանիշի վրա Հենց սկզբից ՀՀԿ-ի նախընտրական ռազմավարությունը` սև ու սպիտակի ներկայացումը նշանակում էր, որ նրանք մտածում էին, թե իրենց հաջողություն կարող է բերել, որովհետև իրենք փորձում են ներկայանալ որպես «Իմ քայլի» այլըտրանք, ի դեպ, շատ դեպքերում սխալմամբ նշվում է որպես ընդդիմություն, բայց ժողովուրդը չի քվեարկում որպես ընդդիմություն, քվեարկում է այլ սզկբունքներից ելնելով` ինչքանով է տվյալ կուսակցությունը այլընտրանք հանդիսանում այս կամ այն ուժին: Եվ ահա ՀՀԿ-ն վերցրել է այդ ռազմավարությունը, սև ու սպիտակը ռիսկային ռազմավարություն է, բայց այս պահին, ըստ իրենց, աշխատող ռազմավարություն է: Հիմա իրենք գտնում են, որ միակ հնարավոր ռազամավարությունը, որ կարող է իրենց հաջողություն բերել դա է, և դա նրանք իրականացնում են, ավելին, ոչ միայն իրականցնում են, այլև իրենց հաջողվու է օրակարգ թելադրողի դերում հանդես գալ: Փաստորեն ստացվում է` «Իմ քայլը» սկսում է անընդհատ պատասխանել նրանց, սկսվում է շարժվել նրանց կողմից մշակված ռազմավարությանբ: Իրենց դա հաջողվում է, բայց սա չի նշանակում, որ միանշանակ կարող է ՀՀԿ-ին հաջողություն բերել: Վարչապետի պաշտոնակատարի վարկանիշի վրա ՀՀԿ-ի տեսանյութերը չեն ազդի, որովհետև «Իմ քայլի» մոտ ՀՀԿ-ն հեղինակություն չէ, «Իմ քայլի» ընտրազանգվածը կընտրի իրենց, ինչ վերաբերում է տատանվող ընտրազանգվածին, ապա այս հոլովակները կարող է իջեցնեն կուսակցության գրավչությունը և ազդեն չկողմնորոշված ընտրազանգավծի վրա, բայց արդյոք չքվեարկելով «Իմ քայլի» օգտին, կքվեարկեն ՀՀԿ-ին, դա միանշանակ չէ:
Հետևեք մեզ Viber-ում
