Թուրքիան մասնատման վտանգի տակ է. հարցում

Թուրքական Son dakika լրատվական կայքի փոխանցմամբ՝ Քադիր Հաս համալսարանը 2015 թվականի դեկտեմբերի 9-17-ին Թուրքիայի 26 մարզկենտրոններում հերթական տարեկան հարցախույզն է անցկացրել տարբեր հարցերի շուրջ։ Հարցմանը մասնակցել է ավելի քան 1000 մարդ, որոնց տարիքը կազմել է 18-ից բարձր։ Հարցերից մեկը եղել է հետևյալը. «Ձեր կարծիքով՝ Թուրքիան մասնատման վտանգի տա՞կ է»։ Հարցվածների 54.2 տոկոսը դրական պատասխան է տվել դրան։ Ընդգծվում է, որ 2014 թվականին այդ ցուցանիշը կազմել է 46.2 տոկոս։ Հարցվածները 2015 թվականին Թուրքիայի առջև ծագած ամենամեծ խնդիրը համարել են ահաբեկչության խնդիրը՝ 39.3 տոկոս (2014 թվականին ահաբեկչությունը նշել է հարցման մասնակիցների 13.9 տոկոսը)։ 33 տոկոսի կարծիքով էլ՝ Թուրքիայի առջև ծառացած ամենամեծ խնդիրը գործազրկությունն է՝ 33 տոկոսը (2014 թվականին՝ 16.3 տոկոս)։ Հարցման մասնակիցները պատասխանել են նաև «Վերջին մեկ տարվա տնտեսական զարգացումներն ինչպե՞ս են ազդել ձեր վրա» հարցին։ 2015 թվականին այդ հարցին 53.2 տոկոսը պատասխանել է, որ դրանք բացասաբար են ազդել իրենց վրա (2014 թվականին՝ 45.3 տոկոս)։ Հարցվածների 67.4 տոկոսը կարծում են, որ Թուրքիայի Կենտրոնական բանկին անհրաժեշտ է ունենալ քաղաքական ոլորտից անկախություն։ Հարցվածների 45.8 տոկոսը կարծում է, որ Թուրքիայի կառավարությունն անհաջող պայքար է մղում «Քրդստանի աշխատավորական» կուսակցության (PKK) դեմ։ Եթե 2014 թվականին Թուրքիայում ԴԱԻՇ-ին որպես ահաբեկչական կազմակերպություն էր դիտարկում հարցվածների 93.2 տոկոսը, ապա 2015 թվականին այդ ցուցանիշը նվազել է մինչև 86.4 տոկոսի։ Եթե 2014 թվականին ԴԱԻՇ-ին Թուրքիայի համար սպառնալիք էր դիտարկում հարցվածների 82.3 տոկոսը, ապա 2015 թվականին նման կերպ կարծել է հարցվածների 78 տոկոսը։