«Բարիշելու» ժեստեր` Փաշինյանին

Ադրբեջանի փոխնախագահ Ալի Հասանովը Հայաստանին հրավիրել է միանալ տարածաշրջանային տնտեսական ծրագրերին, պայմանով, որ հայկական կողմը դադարեցնի «ադրբեջանական հողերի օկուպացիան»: «Անադոլու» գործակալության հետ զրույցում, խոսելով թուրք-ադրբեջանական առևտրատնտեսական հարաբերությունների ներուժի մասին, Հասանովը անդրադարձել է նաև հարևան Հայաստանին: - «Ադրբեջանի և Թուրքիայի համագործակցությունը վտանգ չի ներկայացնում ո՛չ հարևան, ո՛չ էլ այլ երկրների համար: Երկուստեք խաղաղության և բարօրության համար մենք բաց ենք բոլոր երկրների առաջ: Հայաստանի ղեկավարությունը, իր բռնազավթիչ քաղաքականությամբ և Թուրքիային ուղղված անհիմն պնդումներով վտանգում է սեփական ժողովրդին: Եթե Հայաստանը խաղաղություն է ուզում և ցանկանում է մասնակից լինել Ադրբեջանի և Թուրքիայի տեղական ու միջազգային ձեռնարկներին, թող համենա: Թող դուրս գան օկուպացրած տարածքներից, կատարեն խաղաղության համար անհրաժեշտ իրավական պահանջները: Մենք Հայաստանի դեմ չենք: Մենք Հայաստանին կոչ ենք անում գնալ խաղաղության», - հայտարարել է ադրբեջանցի պաշտոնյան: Ադրբեջանն ու Թուրքիան են տնտեսական շրջափակման մեջ պահում Հայաստանը, իսկ ադրբեջանական կողմից վերջին տարիներին հնչում է հիմնականում ռազմաշունչ հռետորաբանություն: Այժմ էլ Հայաստանի խորհրդարանական ընտրությունների ֆոնին, իշխանափոխությունից 7 ամիս անց Բաքուն ցույց է տալիս, թե Հայաստանի իշխանության հետ պատրաստ է «բարիշել»: Բաքվի քաղաքականությունն, իրականում, բավական պարզունակ է: Նրանք, քանի դեռ Փաշինյանի հետ բուն բանակցություններ չեն կայացել՝ ցույց են տալիս կառուցողականություն, նույնիսկ՝ «շողոքորթելու» որոշակի ազդակներ են հասցնում: Իհարկե, Բաքուն չի մոռանում նաև Հայաստանին հիշեցնել «գրավյալ տարածքներից» դուրս գալու իր պահանջը: Այսպիսով, Ադրբեջանն ու Թուրքիան միջազգային հանրությանը, կարծես, ցույց են տալիս «նոր մոտեցումներ», հույս արթնացնելու կառուցողական բանակցությունների համար: Սակայն իրականում, որևէ նոր բան չկա՝ Բաքվի ու Անկարայի քաղաքականությունը նույնն է. հիմքում Հայաստանից զիջումներ կորզելն ու միջազգային հանրությանը Հայաստանի անզիջում կեցվածքը ցույց տալն է: Մետաքսյա Շալունց