Ասել, որ Բաքուն կճանաչի ԼՂ անկախությունը, դժվար թե իրականություն դառնա. Զատուլին

«Լազարևյան ակումբի» նիստում ՌԴ Պետական դումայի ԱՊՀ գործերով, եվրասիական ինտեգրման և հայրենակիցների հետ կապերի կոմիտեի նախագահի առաջին տեղակալ Կոնստանտին Զատուլինը անդրադարձել է նաև  Ղարաբաղի խնդրին` նշելով, որ  Ռուսաստանի համար Ղարաբաղը Խորհրդային միության փլուզումն էր հիշեցնում, դժվար էր հրապարակային ելույթներ ունենալ այս մասին, որովհետև ցանկություն կար լավ հարաբերություններ պահել հարևան Ադրբեջանի հետ: Նա շեշտել է, որ Հայաստանը ՀԱՊԿ, ԵԱՏՄ անդամ է, իսկ Ադրբեջանը՝ ոչ: Ավելին, Կ. Զատուլինը հիշեցրեց, որ ժամանակին Ադրբեջանը մասնակցում էր մեկ այլ ֆորմատի՝ Վրաստան-Ուզբեկստան-Ուկրաինա-Մոլդովա, որը բաժանում էր հետխորհրդային տարածքը ճամբարների: «Ադրբեջանը մտնում է այն պետությունների մեջ, որոնք դիրքավորում են իրենց ոչ թե որպես այլընտրանք Ռուսաստանին, այլ հետխորհրդային տարածքին այլակարծիք միավոր: Մեծ դժվարությամբ է հաջողվում հրապարակային քննարկում անցկացնել Ղարաբաղի հարցում, ասում են՝ եկեք թողնենք այս հարցը, որ չվնասենք, չխանգարենք: Մենք չենք կարող չքննարկել հարցը: Վերջնական պայմանավորվածությունը ենթադրում է Ղարաբաղի անկախության ճանաչում և այն շրջանների վերադարձ, որոնք նախկինում չեն եղել Ղարաբաղի մասը: Սա այն է, ինչ ցանկացած կոնֆլիկտի լուծման հիմքում է: Ասել, որ պետք է վերադարձնել շրջանները նրա դիմաց, որ ապագայում Բաքուն կճանաչի ԼՂ անկախությունը, դժվար թե իրականություն դառնա: Այսօր Ադրբեջանը 2016-ին հրադադարի ռեժիմի խախտման մեղավորն է, Ադրբեջանը մեծացնում է ագրեսիվ հռետորաբանությունը, մենք ամեն օր լսում ենք հարցը ուժով լուծելու մասին, ասվում է, որ կգրավեն ոչ միայն Ղարաբաղը, այլև Երևանը և սա չի նպաստում վստահության հաստատմանը»,- նշեց ՌԴ պետդումայի պատգամավորը: