Նիկոլ, ուշքի արի, քանի դեռ ուշ չէ
Նախընտրական քարոզարշավը վտանգավոր հուն է մտել: Նիկոլ Փաշինյանը անդրադարձել է Ղարաբաղից հնչող քննադատական տեսակետներին, հերիք չէ մեղադրանք է ներկայացրել Բակո Սահակյանին այն բանի համար, որ նա կարգի չի հրավիրում իր կառավարության ներկայացուցիչներին, այլեւ զգուշացրել, որ հաշիվ է պահանջելու նրանից այդ բանի համար, միայն թե ոչ հիմա, այլ ընտրություններից հետո: «Ընդհանրապես վերջին օրերին լավ չեմ հասկանում Լեռնային Ղարաբաղի իշխանության ներկայացուցիչների ակտիվությունը, բացարձակ չեմ հասկանում, ինչի՞ են ակտիվացել և ինչի՞ են փորձում խառնվել և իրենց ներկայությունը ցույց տալ Հայաստանի խորհրդարանի ընտրությունների քարոզարշավի ընթացքում: Ասեմ, որ շատ հարցեր ունեմ դրա կապակցությամբ, և այդ հարցերն, անպայման, կքննարկեմ ԼՂՀ նախագահ Բակո Սահակյանի հետ, իսկ մինչ այդ պարոն Բակո Սահակյանին հորդորում եմ կարգի հրավիրել իր կառավարության ներկայացուցիչներին և ուղարկել իրենց աշխատանքը կատարելու»,- մասնավորապես ասել է Փաշինյանը: Ինչպես հայտնի է, Փաշինյանի կուսակցական ղեկավար Սասուն Միքայելյանն իր ելույթում Արցախի ազատամարտի նշանակությունը ստորադասել էր թավշյա հեղափոխության հաղթանակին: Ինչին ի պատասխան արձագանքեցին արցախի բարձրաստիճան, ինչպես նաեւ պատերազմի հերոսներ ու գեներալներ: Հիմա Փաշինյանը զգուշացնում է Արցախի նախագահին կարգի հրավիրել իր թիմին, ավելին արգելում է Սահակյանի խոսնակին <<առիթ-անառիթ>> իր խոսքերը մեկնաբանել: Միքայելյանի այդ խոսքին արձագանքողներ եղան և՛ Հայաստանից, և՛ Ղարաբաղից: Հատկապես Ղարաբաղից արձագանքը բավական կոշտ էր, ինչը հասկանալի է: Փառք Աստծո, որ Արցախի նախագահ Բակո Սահակյանը չի իջնում հեղափոխական գործչի մակարդակին ու չի ճղճղում նույն տոնայնությամբ՝ պարոնին հասկացնելով, որ միայն դարավոր բարեկամ պետության ղեկավարի մտքով կարող է անցնել, որպեսզի արգելեն արցախցիներին կարծիք հայտնել, միայն Իլհամ Ալիեի պես հիվանդ բռնապետը կարող է որոշել, որ որեւէ մեկը չի կարող հակադրվել իր կարծիքին, կամ առնվազն բարձրաձայնել այդ մասին: Բակո Սահակյանը ի հեճուկս Փաշինյանի գիտակցում է պահի վտանգավորությունը եւ այն, թե ուր կարող է տանել նման թշնամանքի սերմանումը: Բակո Սահակյանը հեղափոխության առաջին իսկ օրվանից, երբ միջազգային հանրությունը դիմադրում էր Փաշինյանի վարչապետական հայտին, համարելով, որ փողոցից շանտաժով իշխանություն վերցնելու ճանապարհը հեռու է ժողովրդավարությունից, առաջինն էր, որ համախոհություն հայտնեց հայաստանյան նոր իշխանությանը, քանի որ մյուս նժարին դրված էր Արցախի հարցը ու ինչ-ինչ ուժեր կարող էին օգտվել այդ իրավիճակից: Հասկանում է նաեւ հիմա ու թերեւս այդ պատճառով է, որ պաշտոնական Ստեփանակերտը անարձագանք է թողնում Փաշինյանի սպառնալիքները, քանի որ դրան կարող է հաջորդել Բաքվի հերթական աղաղակը: Հիշեցնենք, որ հեղափոխությունից հետո Ալիեւը միջազգային հարթակում առաջին իսկ հնարավորությունից շահարկել էր Փաշինյանի հայտարարությունները ասելով«Պատահական չէ, որ քրեական ռեժիմը տապալվեց, որն ավելի քան 20 տարի ղեկավարում էր Հայաստանը, և այսօր հայ ժողովուրդը ասում է այն, ինչ ասում էինք մենք: Հուսով ենք, որ Հայաստանի նոր ղեկավարությունը կառուցողական դիրք կունենան Լեռնային Ղարաբաղի հիմնախնդրի հարցում, մեր հողերը ազատվելու են, և տարածաշրջանում խաղաղություն ու համագործակցություն կստեղծվի», — ասել է Ալիևը: Եւ ինչ, արդյոք այս խժդժությունները հիմք չեն տա վերջինիս հերթական այն հայտարարության, որ Ղարաբաղում բեսպրեդել է եւ այնտեղի բարձրաստիճանները խառնվում են այլ պետության ներքին հարցերին: Լեռնային Ղարաբաղի «Հելսինկյան նախաձեռնություն-92» կոմիտեի համակարգող Կարեն Օհանջանյանը անդրադառնալով հարցին իր էջում Փաշինյանին հիշեցրել է.«Մի մոռացեք, որ մեր ժողովուրդն ընտրել է մեր նախագահին և իշխանության մարմիններին ամբողջությամբ թափանցիկ և մրցակցային հիմքի վրա»: Նա գրել է, որ որպես Արցախի Հանրապետության քաղաքացի՝ երբեք չէր մտածի, որ Հայաստանի ղեկավարը երբևէ կարող է հասնել Լեռնային Ղարաբաղի նկատմամբ չարության այնպիսի մակարդակի, ինչպես ներկայումս է տեղի ունենում: Նրա խոսքով, Հայաստանի ոչ մի ղեկավար երբեք, Հայաստանի ոչ մի պաշտոնատար անձ իրեն թույլ չի տվել անհիմն հրապարակային պատիժ կազմակերպել Արցախի ժողովրդի ընտրված ներկայացուցիչների նկատմամբ:«Պարոն Հայաստանի վարչապետի պաշտոնակատար, ո՞վ է Ձեզ թույլ տվել հարազատ պետության ղեկավարին անհարիր կերպով արտահայտվել Արցախի ղեկավարների հասցեին: Նման բան իրեն թույլ չի տալիս նույնիսկ մեզ թշնամի պետության ղեկավարը:Մի մոռացեք, որ մեր ժողովուրդն ընտրել է մեր նախագահին և իշխանության մարմիններին ամբողջությամբ թափանցիկ և մրցակցային հիմքի վրա: Ես արտահայտում եմ Արցախում էական թվով մարդկանց կարծիք, որոնք վրդովված են Ձեր պահվածքից և պահանջում են Ձեզնից ճանաչել սեփական չափը և այն, թե որտեղ են ավարտվում ձեր իրավասությունները>>: Գրել է նաեւ, որ Փաշինյանի բերանից սիրո և հանդուրժողականության քարոզի փոխարեն՝ ատելություն է հոսում բոլոր նրանց ուղղությամբ, ովքեր ինչ-որ հարցերում համաձայն չեն իր հետ: Անի Սահակյան
Հետևեք մեզ Viber-ում
