Ուրիշ նվեր չունե՞ք Ալիևին մատուցելու
Նիկոլ Փաշինյան-Բակո Սահակյան լարումը հասնում է գագաթնակետին Վարչապետի պաշտոնակատար Նիկոլ Փաշինյանն այսօր Գեղարքունիքի մարզի Ճամբարակ համայնքում ունեցած ելույթում դիմել է Արցախի նախագահ Բակո Սահակյանին՝ հորդորելով կարգի հրավիրել իր կառավարության ներկայացուցիչներին: «Ընդհանրապես վերջին օրերին լավ չեմ հասկանում Լեռնային Ղարաբաղի իշխանության ներկայացուցիչների ակտիվությունը, բացարձակ չեմ հասկանում, ինչի՞ են ակտիվացել և ինչի՞ են փորձում խառնվել և իրենց ներկայությունը ցույց տալ Հայաստանի խորհրդարանի ընտրությունների քարոզարշավի ընթացքում: Ասեմ, որ շատ հարցեր ունեմ դրա կապակցությամբ, և այդ հարցերն, անպայման, կքննարկեմ ԼՂՀ նախագահ Բակո Սահակյանի հետ, իսկ մինչ այդ պարոն Բակո Սահակյանին հորդորում եմ կարգի հրավիրել իր կառավարության ներկայացուցիչներին և ուղարկել իրենց աշխատանքը կատարելու»,- հարթակից ասել է Փաշինյանը: Փաշինյանին վրդովվեցրել է այն հանգամանքը, որ վերջին օրերին իր հայտարարություններից որոշներին մեկնաբանություններ են տրվում Արցախից: Մասնավորապես՝ նախագահ Բակո Սահակյանի մամուլի խոսնակ Դավիթ Բաբայանն անդրադարձել էր Փաշինյանի այն հայտարարությանը, որ ինքը Հայաստանի միակ ղեկավարն է ում որդին ծառայել է ԼՂՀ-ում: «Առիթ-անառիթ իրենց մեկնաբանություններն են անում, չհասկացա, Ղարաբաղի նախագահի մամուլի խոսնակն օր ու մեջ իմ ասածների վերաբերյալ մեկնաբանություններ է տալիս, պատկերացնո՞ւմ եք՝ իմ մամուլի խոսնակը Ղարաբաղի հայտնի և անհայտ իրադարձությունների վերաբերյալ սկսի մեկնաբանություններ տալ, հասկանո՞ւմ եք՝ դրա հետևանքն ու արդյունքը ինչ կլինի: Սթափվե՛ք և զբաղվե՛ք ձեր աշխատանքով: Իհարկե, ինչ տեղի է ունեցել, ձեզ հետ կքննարկեմ, բայց ընտրություններից հետո, իսկ մինչ այդ ասում եմ՝ զբաղվեք ձեր գործով», ասել է Նիկոլ Փաշինյանն՝ ապա հավելել. «Ասում են՝ վայ, նախընտրական շահարկում, Ռոբերտ Քոչարյանի որդիները… Ի՞նչ Ռոբերտ Քոչարյանի որդիները, ես պաշտոնական տեղեկանք եմ ուզել Ռոբերտ Քոչարյանի որդիների ծառայության վերաբերյալ, ասում եմ՝ Ռոբերտ Քոչարյանի որդիները ծառայել են Երևանում: Ոչ մի գիշեր չեն անցկացրել որևէ զորամասում, ծառայել է ՊՆ վարչական մասում, մյուս որդին էլ ծառայել է որպես վարորդ պետական ավտոն դրել են տակը, ուր ուզել գնացել է, պետության, ավտոյի հաշվին և այլն: Էդ ինչի՞ եք ոգևորվել»: Արցախի թեման, այսպիսով, մտավ Հայաստանի նախընտրական քարոզարշավի օրակարգ: Ոչ թե Արցախի ապագայի, կամ ԼՂ խնդրի լուծման պատկերացումների, քննարկումների հարցով, այլ Հայաստանի և Արցախի իշխանության միջև լարման տեսքով: Սա ամենաանցանկալի սցենարն էր, որը կարելի էր ունենալ: Երևի թե որևէ մեկը չէր խանգարի, որպեսզի Նիկոլ Փաշինյանը հեռախոսակապի միջոցով՝ Բակո Սահակյանի հետ զրույց ունենար և հայտներ իր մտահոգությունները: Բայց ոչ՝ նա դա նախընտրեց անել նախընտրական քարոզարշավի շրջանակներում՝ հրապարակավ: Ամեն ինչ սկսվեց Սասուն Միքայելյանի հայտնի աղմկահարույց ելույթից հետո, երբ նա ասել էր, թե Հայաստանում տեղի ունեցած հեղափոխությունն ավելի կարևոր էր, քան Արցախյան ազատամարտը: Արցախի իշխանության ներկայացուցիչները ֆեյսբուքյան գրառումներով մեկը մյուսի հետևից սկսեցին նախատել Սասուն Միքայելյանին՝ Սենոր Հասրաթյանը, որը հետո ջնջեց իր ֆեյսբուքյան գրառումը, Արցախի հերոս, «Ոսկե արծիվ» շքանշանի ասպետ, գեներալ-մայոր Վիտալի Բալասանյանը, Արցախի Հանրապետության նախագահի ներկայացուցիչ՝ հատուկ հանձնարարությունների գծով ներկայացուցիչ Արշավիր Ղարամյանը: Արդեն իսկ պարզ էր, որ սա անհետևանք չի մնալու, օդում խայծ է պակասում: Թերևս, դա գիտակցելով՝ երեկ ՀՀ Ազգային ժողովի նախագահ Արա Բաբլոյանը հայտարարությամբ հանդես եկավ՝ հորդորելով՝ «ջենթլմենական պայմանավորվածությամբ» Արցախի թեման ընդհանրապես հանել նախընտրական առօրյա ելույթներից: «ՀՀ շուրջ 30-ամյա պատմությունն ապացուցել է, որ կան արժեքներ, որոնք ենթակա չեն որևէ շահարկման, չարաշահման, սակարկությունների, ինչպես նաև այդ արժեքները չեն կարող իջեցվել անձնական կամ քաղաքական նախընտրական շահերի մակարդակ: Այդ արժեքներում իր ուրույն տեղն ունի Արցախը»: Նա շարունակում է. «Արցախի հարցում մեզանում գոյություն չպետք է ունենան սևեր, կարմիրներ, սպիտակներ կամ կանաչներ: Քաղաքական գույների բաժանումները, եթե չենք կարողանում հրաժարվել դրանցից, տարածենք բացառապես քաղաքական պայքարի վրա, իսկ Արցախն ու Հայաստանի Հանրապետությունն ունեն ընդամենը մեկ միասնական գույն, և դա հայկական եռագույնն է: Ընդ որում, ասվածը հավասարապես վերաբերվում է բոլոր քաղաքական ուժերին»: Այնուհետև ԱԺ նախագահը հորդորում է. «Սիրելի բարեկամներ, եռագույնն ընդհանուր է, ինչպես ընդհանուր է Արցախի և Հայաստանի Հանրապետության անվտանգությունը և Արցախի ու Հայաստանի Հանրապետության ապագան: Ուստի բոլորիդ հորդորում եմ Արցախի հարցով համախմբվել մեկ միասնական դիրքորոշման շուրջ՝ ջենթլմենական պայմանավորվածությամբ Արցախի թեման կամ Արցախ անվանումն ընդհանրապես հանել նախընտրական ելույթների և բանավեճերի առօրյա բառամթերքից: Դիմում եմ Արցախի իմ քույրերին ու եղբայրներին: Խնդրում եմ նախընտրական այս օրերին զերծ մնալ կրքեր բորբոքելուց և անարձագանք թողնել հնչեցվող որոշ հայտարարություններ, որոնք, ամենայն հավանականությամբ, մտքերի ոչ ճիշտ ձևակերպումների հետևանք են»։ Հայաստան-Արցախ իշխանությունների միջև լարվածության աճը կարող է պայթյունի բերել: Սա, կարծում ենք, պարզ է բոլորի համար, բացառությամբ թերևս Փաշինյանի թիմակիցների: Արցախի իշխանության փոփոխության հարցը ԱԺ ընտրություններում շահարկում է «Սասնա ծռերը»: Եթե այս ամենին էլ գումարվում է Փաշինյանի կողմից վերաբերմունքի բացահայտ ցուցադրությունը, հաթաթաներն ուղղված Արցախի իշխանությանը, ապա այս իրավիճակից կլինեն օգտվողներ՝ թե երկրի ներսում, թե Հայաստանի ու Արցախի սահմաններից դուրս: Սա ևս, պետք է գիտակցի Փաշինյանի թիմը: Մի կողմից Հայաստանում մշտապես ասել են, թե Արցախում ժողովրդավարություն, ազատ խոսք պետք է հաստատվի, մյուս կողմից, փաստորեն, Փաշինյանը չի հանդուրժում այլ կարծիք Արցախի իշխանությունների կողմից, մարդիկ, ովքեր պահում են Արցախը: Ի՞նչ է, Արցախը արյան գնով պահած մարդիկ իրավունք չունե՞ն կարծիք հայտնել: Մի՞թե դժվար է հասկանալ, որ Արցախի իշխանությանը հրապարակավ քննադատելով՝ կոտրում ենք ոչ միայն Արցախի ողնաշարը, այլև Հայաստանի ողնաշարը: Սա Հայաստանի ու Արցախի գոյության հարց է: Ո՞ւմ եք այսպես ուրախացնում, Իլհամ Ալիևին էլ ուրիշ նվեր չունե՞ք մատուցելու: Թամար Բագրատունի
Հետևեք մեզ Viber-ում
