Գոռ Աբրահամյանը՝ Էջմիածնում ՀՀԿ–ին գովազդային վահանակ չտրամադրելու հայտարարության մասին

22:10 - 30/նոյեմբերի/2018

ՀՀ գլխավոր դատախազի ԶԼՄ գծով խորհրդական Գոռ Աբրահամյանը ֆեյսբուքյան իր էջում անդրադարձել է Հայաստանի Հանրապետական կուսակցության հայտարարությանը, որում նշվում էր, որ Էջմիածնում ՀՀԿ-ին հրաժարվել են գովազդային վահանակ տրամադրել քարոզչություն իրականացնելու համար, իսկ պետական մարմիններն անգործություն են դրսևորում: Գոռ Աբրահամյանը, մասնավորապես, գրել է. «ԱԺ արտահերթ ընտրությունների շրջանակներում Հայաստանի Հանրապետական Կուսակցության նախընտրական քարոզչությունը Էջմիածին քաղաքում խոչընդոտելու դեպքի և այդ առթիվ ՀՀ գլխավոր դատախազություն հանցագործության մասին հայտարարություն տալու վերաբերյալ ՀՀԿ նախընտրական շտաբի՝ այսօր տարածած հայտարարության կապակցությամբ անհրաժեշտ եմ համարում հայտնել հետևյալը: ՀՀԿ նախընտրական շտաբի կողմից ներկայացված հաղորդումը ՀՀ Արմավիրի մարզի դատախազությունից ուղարկվել է ՀՀ Քննչական կոմիտեի Վաղարշապատի քննչական բաժին՝ ՀՀ քրեական դատավարության օրենսգրքի 180-181-րդ հոդվածներով սահմանված կարգով նյութեր նախապատրաստելու և ընթացքը լուծելու նպատակով: Մարզի դատախազի կողմից հանձնարարվել է անհապաղ իրականացնել անհրաժեշտ բոլոր գործողությունները ներկայացված հանգամանքները պարզելու և տեղի ունեցածին քրեաիրավական գնահատական տալու ուղղությամբ»: Հիշեցնենք, որ Հայաստանի Հանրապետական կուսակցությունը հաղորդագրություն էր տարածել՝ տեղեկացնելով, որ Էջմիածնում ՀՀԿ-ին հրաժարվել են գովազդային վահանակ տրամադրել քարոզչություն իրականացնելու համար, իսկ պետական մարմիններն անգործություն են դրսևորում: Կազմակերպության կողմից վահանակը տրամադրելուց հրաժարվելը ոչ այլ ինչ է, քան նախընտրական քարոզչության իրականացմանը խոչընդոտել, ինչը ՀՀ քրեական օրենսգրքով համարվում է հանցավոր արարք», ասված էր կուսակցության հայտարարության մեջ։