Իմ և ընդհանրապես ՀՀԿ ցուցակով առաջադրված բոլոր թեկնածուների հիմնական մրցակիցն այս պահին մեկ անձ է՝ Փաշինյանը. Մենուա Հարությունյան
«ՀՀԿ ցուցակով առաջադրված բոլոր թեկնածուների հիմնական մրցակիցն այս պահին մեկ անձ է՝ Փաշինյանը. այլ մրցակիցներ չկան»: Մենուա Հարությունյանն այս մասին հայտարարել է «Հայոց Աշխարհ» թերթին տված հարցազրույցում:
Անդրադառնալով այն հարցին, թե ինչպես է անցնում քարոզարշավը, ում է համարում իր հիմնական մրցակիցը և ինչ խնդիրներ է արձանագրել այս ընթացքում ու ինչ ակընկալիքներ ունի «առանց կանոնների» այս ընտրական մարտերից՝ Մենուան ասել է. «Քարոզարշավն ընդհանուր առմամբ նորմալ է անցնում: Աշխատում եմ հնարավորինս շատ հանդիպել սյունեցիների հետ և ներկայացնել իմ տեսակետները: Իմ և ընդհանրապես ՀՀԿ ցուցակով առաջադրված բոլոր թեկնածուների հիմնական մրցակիցն այս պահին մեկ անձ է՝ Փաշինյանը. այլ մրցակիցներ չկան, որովհետև նրա թիմի յուրաքանչյուր անդամ հասարակությանը ներկայանում է «Մենք Նիկոլի հետ ենք» կարգախոսով մտնում են ժողովրդի մեջ, ասում են՝ Մենք Նիկոլի հետ ենք, մենք Նիկոլի հետ ենք, որ իրենց վրա ուշադրություն հրավիրեն:
Սյունիքում էլ գործում է նույն տրամաբանությունը՝ հիմնականում առաջադրված են այնպիսի թեկնածուներ, որոնք այնպես չէ, թե բարձր վարկանիշ ունեն իրենց շրջապատում կամ քաղաքներում, որտեղ առաջադրվել են՝ գնում են ժողովրդին ասում են՝ մենք Նիկոլի հետ ենք, ժողովուրդը սկսում է լսել, ինչ-որ անհոդաբաշխ բաներ են խոսում, անհասկանալի խոստումներ են տալիս... Այսինքն՝ կա Փաշինյանի անձը, և կա դրա շուրջ ձևավորված «թիմ», որը նրա անունը տալով՝ քարոզարշավ է անում. Սա՛ է իրականությունը, և՛ իմ, և՛ բոլորի մրցակիցը Փաշինյանն է, ուրիշը չկա»:
Պատասխանելով այն հարցին, թե նույն ընտրատարածքում առաջադրված Նաիրա Զոհրաբյանին մրցակից չի՞ համարում, ՀՀԿ պատգամավորական թեկնածուն ասել է, որ նույն խնդիրն ունի նաև Նաիրա Զոհրաբյանը: Ինքն էլ է գնում, ներկայացնում է իր կուսակցության դիրքորոշումը, ու նրա մրցակիցն էլ մեկն է՝ Նիկոլ Փաշինյանը:
«Պարզ է՝ ինքը չի քննադատում Նիկոլ Փաշինյանին, ես քննադատում եմ, բայց միևնույն է, մրցակցությունը իմ ու Նաիրայի միջև չէ, իմ ու Փաշինյանի, Նաիրայի ու Նիկոլի մեջ է»,- «Հայոց Աշխարհ» թերթի հետ զրույցում ասել է Մենուա Հարությունյանը:
Հետևեք մեզ Viber-ում
