Նա, ով մաքսանենգ ապրանք է ներկրում, նա էլ է գողանում մեր երկրի գումարը. Փաշինյան

«Գազալցակայաններում պետք է միջազգային ստանդարտի զուգարաններ կառուցվեն: Այդ գազալցակայաններից շատերը միլիոններ են աշխատում, բայց ալարել են 2 կոպեկ փող ծախսեն, միջազգային չափանիշներին համապատասխան զուգարաններն ու լվացարանները կառուցեն»,-Նոյեմբերյան քաղաքի հրապարակում բնակիչների հետ հանդիպման ժամանակ նշեց վարչապետի պաշտոնակատար, «Իմ քայլը» դաշինքի ցուցակը գլխավորող Նիկոլ Փաշինյանը: « Կոռումպացված չինովնիկը գողանում է մեզ բոլորիս պատկանող հարստությունը : Բայց նա, ով մաքսանենգ ապրանք է ներկրում, նա էլ է գողանում մեր երկրի գումարը, մեր երկրի ազգային հարստությունը, պոտենցիալ թոշակները: Ուզում եք չէ՞, որ թոշակները բարձրանա: Եթե մեկն իր խանութում մաքսանենգ ապրանք է վաճառում, ինչ է, թե 10-20 դրամով էժան է, գնում առնում ենք, մի հատ էլ ուսին թփթփացնում ենք, աչքով ենք տալիս, ասում ենք՝ մալադեց, որ տենց շուստրի տղա ես: Մի հատ գան բռնեն, դուրս կգան ճանապարհները կփակեն, ճի՞շտ է: Բայց եթե մենք ուրիշներից պահանջում ենք, որ չգողանան, ուրեմն մենք էլ չպետք է գողանանք: Եթե մենք ոստիկանությունից պահանջում ենք, որ հանցագործությունները բացահայտեն, մենք էլ  հանցագործություն տեսնելիս չպետք է աչք փակենք: Հեղափոխությունը սա է»,-հայտարարեց Փաշինյանը և հավելեց.«Երբ քաղաքացիներին թույլ է տրվում, որ գնան Վրաստանից իրենց համար սննդամթերք գնեն, դա չի նշանակում, որ պետք է չարաշահեն այդ վստահությունը եւ օրական 50 անգամ գնան գան ու ապրանք բերեն ոչ թե իրենց օգտագործման, այլ վաճառքի համար: Չի կարելի այդ վստահությունը դարձնել 3-5 հազար դրամ: Մեր վստահությունը շատ ավելի թանկ արժի, քան այդ հազար դրամը կամ նույնիսկ 100 հազար դրամը»,-ընդգծեց Փաշինյանը: