Հայկ Մարությանը վերին արտի ցորեն. նա ճնշել է Նոր Նորքի թաղապետին

Պարզվում է՝ հեղափոխական իշխանությունները կադրային քաղաքականության հարցում նույնպես երկակի ստանդարտների կողմնակից են։ Չնայած Նիկոլ Փաշինյանը ամիսներ առաջ է հայտարարել, որ քանդում են բարիկադները եւ նախկին պրոֆեսիոնալները կարող են նոր Հայաստանին էլ իրենց պրոֆեսիոնալիզմով ծառայել, վկան վերջերս Սյունիքի մարզպետ նշանակված Հունան Պողոսյանն է, որը նախկինում զբաղեցնում էր փոխոստիկանապետի պաշտոնը, սակայն նրա ենթակաները թքած ունեն վարչապետի այդ հայտարարության վրա եւ շարունակում են «սեւ-սպիտակի» բաժանումը։ Մեր տեղեկություններով՝ մոտ մեկ շաբաթ առաջ Նոր Նորք վարչական շրջանի նորանշանակ ղեկավար Հայկ Մհրյանը ստիպել է հրաժարականի դիմում գրել իր տեղակալին, որին անձամբ ինքն է առաջարկել ու նշանակել այդ պաշտոնում ընդամենը երկու շաբաթ առաջ՝ նոյեմբերի 6-ին։ Խոսքը Նոր նորք վարչական շրջանի մշակույթի կենտրոնի ավելի քան 15 տարվա տնօրեն, մինչեւ վերջերս ՀՀԿ կուսակցության անդամ Ալվինա Հարությունյանի մասին, որը նաեւ տեղի ՀՀԿ կանանց կառույցի ղեկավարն է եղել մինչև վերջերս։ Հարությունյանին տեղակալ աշխատելու առաջարկը թաղապետարանի մեր աղբյուրի պնդմամբ արվել է Մհրյանի կողմից, քանի որ համայնքի խնդիրներին քաջածանոթ, բանիմաց մարդկանց կարիքն էր զգացվում և նա ցանկանում էր այդպիսիններով համալրել թաղապետարանը։ Նորանշանակ թաղապետը տիկնոջը հանդիսավորությամբ ներկայացնում է նաեւ կոլեկտիվին, սակայն երկու շաբաթ անց լրատվականներից մեկի հրապարակումից հետո, որ Ալվինա Հարությունյանը ՀՀԿ-ական է, որ Կարեն Կարապետյանի հետ ազգակցական կապեր ունի, որ Մշակույթի կենտրոնի տնօրեն է նշանակվել վերջինիս շնորհիվ եւ այլն, թաղապետը հետողորմեա է անում եւ խնդրում է իր տեղակալին գրել հրաժարականի դիմում։ Մեր աղբյուրի փոխանցմամբ այդ հրապարակման առիթով Հայկ Մհրյանին իր մոտ է կանչում Երեւանի քաղաքապետ Հայկ Մարությանը, որի ճնշման ներքո թաղապետը ազատվում է իր նշանակած կադրից։ Ի դեպ, մեզ պատմեցին նաեւ, որ Հարությունյանն ու Կարապետյանը, իսկապես, հեռավոր բարեկամներ են, սակայն Մշակույթի կենտրոնի տնօրեն նշանակվելու ժամանակ՝ 15 տարի առաջ Կարապետյանը նույնիսկ հաճախ Հայաստան չէր այցելում։ Սակայն ինչն է առավել ուշագրավ։ Պարզվում է՝ Հայկ Մարությանի կողմից Նոր Նորքի թաղապետ նշանակված Մհրյանը նույնպես այսպես կոչված նախկին ռեժիմի ներկայացուցիչ է։ 2008 թվականին՝ նախագահ Սերժ Սարգսյանի պաշտոնավարման ժամանակ, նշանակվել է ՀՀ ոստիկանության ակադեմիայի ծառայության բաժնի պետի տեղակալ, իսկ հետո՝ ակադեմիայի պետի տեղակալ: Հայկ Մհրյանը ծառայության ընթացքում արժանացել է բազմաթիվ խրախուսանքների և ոստիկանությունում «գերազանց ծառայության համար» պարգևատրվել է կրծքանշանով և մեդալներով: Իհարկե, կարելի է հակադարձել, որ ոստիկանությունը ապաքաղաքական կառույց է, սակայն ոչ Հայաստանում եւ այն էլ հին Հայաստանում։ Այնպես որ ստացվում է, որ Հայկ Մարությանին կարելի է նախկինների նշանակել, իսկ մյուսներին հակացուցված է։ Անի Սահակյան