Սա լուրջ մարտահրավեր է. Փաշինյան

Հայաստանը պետք է Ռուսաստանի հետ հարաբերությունները նոր մակարդակի հասցնի և՛ ԵԱՏՄ-ի, և՛ ՀԱՊԿ-ի մակարդակով: Այս մասին այսօր Վանաձորում հայտարարել է «Իմ քայլը» դաշինքի ցուցակը գլխավորող Նիկոլ Փաշինյանը: Անդրադառնալով ՀԱՊԿ-ում ստեղծված իրավիճակին, Նիկոլ Փաշինյանը նշեց. «ՀԱՊԿ-ում բուռն քննարկումներ են տեղի ունենում, որի իմաստը անդամ երկրների դաշնակցային հարաբերությունները հստակեցնելն է: Մեզ համար այնքան էլ ընդունելի չէ և պարզ չէ, թե ինչու են մեր դաշնակիցները զենք վաճառում մեր նկատմամբ թշնամաբար տրամադրված երկրին: Սա լուրջ մարտահրավեր է, և մենք մտադիր ենք մեր գործընկերների հետ այս թեման պարզ, շիտակ քննարկել: Իմանանք՝ ում վրա պիտի հույս դնենք, ում վրա չդնենք»: Փաշինյանը հայտարարեց, որ ընդհանրապես ՀՀ քաղաքականության տրամաբանությունը պետք է լինի այն, որ մեր հույսը դնենք մեզ վրա, իսկ դրա համար պետք է ուժեղանանք: