«Իսկանդերը» միակը չէ. Ի՞նչ զենք է ստանալու Փաշինյանը՝ Պուտինից

Զինված ուժերի գլխավոր շտաբի պետ Արտակ Դավթյանը սահմանային իրավիճակը դիտարկում է ընդհանուր տարածաշրջանի համատեքստում, որտեղ, նրա խոսքով, «լարվածության ակնհայտ աճ կա»: Երեկ Գյումրիում ուսանողների հետ հանդիպմանը Դավթյանը մի կողմից Սիրիայում տիրող իրավիճակը, մյուս կողմից Ռուսաստան - Արևմուտք հակամարտությունը մատնացույց է արել․ - «Այդ երկու գործոնները, իհարկե, ազդում են մեր տարածաշրջանի վրա, մանավանդ՝ հաշվի առնելով, որ անմիջապես Թուրքիայի Հանրապետությունը ներգրավված է այդ գործընթացին․ բացի քրդերի դեմ պայքարից, իրականացնում է նաև Սիրիայում գործողություններ: Բացի դա, մեր հարևան Ադրբեջանը շարունակում է ռազմատենչ հայտարարությունները, զարգացնել իր զինված ուժերը՝ դրանով փորձելով մշտապես ճնշում գործադրել Հայաստանի Հանրապետության ժողովրդի, ղեկավարության վրա, որպեսզի բանակցային գործընթացում ունենա որոշակի հաջողություններ կամ առավելություններ»: Գլխավոր շտաբի պետը հավելել է, որ ՀՀ զինված ուժերն ամեն ինչ անում են՝ Հայաստանի սահմանների անվտանգությունն ապահովելու համար․ - «Ինչպես նաև հնարավորություն ընձեռելու քաղաքական ղեկավարությանը, որ բանակցությունների ընթացքում զգան իրենց ավելի վստահ և կարողանան վստահ լինել, որ Զինված ուժերը կկատարեն իրենց խնդիրը»: Ուսանողներից մեկը Ռուսաստանից ձեռք բերված «Իսկանդեր» հրթիռային համալիրի մասին հարցրեց՝ նկատելով, որ այն հանրությանը չի ներկայացվում: Արդյո՞ք զորավարժանքներ կամ մարտական գործողություններ անցկացվել են այդ զինատեսակով: «Իսկանդերը» միակ զսպող զինատեսակը չէ, որը մենք ունենք: Ունենք նաև այլ զինատեսակներ, որոնք ժամանակին կներկայացնենք: Հիմա հարմար չի ներկայացնելը, կամ հայտարարելը դրանց վերաբերյալ: «Իսկանդերը», որ ունենք, առաջին անգամ ցուցադրվեց շքերթի ժամանակ: Դրանից հետո ցուցադրելու անհրաժեշտություն ես չեմ տեսնում: Ինչ վերաբերում է զորավարժություններին, զորավարժություններ մշտապես անցկացվում են, այս տարի միայն չորս զորավարժություն է անցկացվել «Իսկանդերի» մասնակցությամբ», - նշել է Արտակ Դավթյանը: Դեռ ամռանը «Коммерсант» պարբերականը տեղեկատվություն էր հայտնել, թե Մոսկվայի և Երևանի հարաբերություններում առաջացած պառակտումը կարող է բացասական ազդել Հայաստանին ռուսական զենքի մատակարարման վրա, մասնավորապես, 100 միլիոն դոլարի վարկը այժմ «մեծ հարցականի տակ» է գտնվում, չի համապատասխանում իրականությանը։ Մինչդեռ ՀՀ պաշտպանության նախարարը հերքեց տեղեկությունը՝ նշելով, որ Ռուսաստանի հետ 100 միլիոն դոլարի վարկային համաձայնագրի շրջանակներում Հայաստանին զենքի մատակարարման գործընթացը չի դադարել։ «100 միլիոն դոլարի վարկային համաձայնագրի շրջանակներում զենքի մատակարարումն ընթացքի մեջ է»,-Մոնթե Մելքոնյանի անվան ռազմամարզական վարժարանում լրագրողների հետ զրույցում ասել էր Դավիթ Տոնոյանը՝ նշելով, որ Հայաստանը զենք է ձեռք բերում ոչ միայն ՀԱՊԿ անդամ, այլ նաև այլ երկրներից: «Коммерсант»-ի տեղեկատվությունը հերքել է նաև «Միջազգային բանակային խաղեր-2018»-ի շրջանակում Հայաստանում գտնվող Ռուսաստանի պաշտպանության նախարարի տեղակալ, գեներալ-գնդապետ Ալեքսանդր Ֆոմինը։ «Դա ոչ ստույգ ինֆորմացիա է, ես դա չեմ հաստատում», ասել էր Ֆոմինը։ Մի քանի օր առաջ էլ պաշտոնական Երևանը հայտարարեց, որ Հայաստանը պայմանագրեր է կնքել ՌԴ-ից զենքի մատակարարման վերաբերյալ: 100 միլիոն դոլարի ռուսական վարկի շրջանակում Հայաստանին սպառազինություն մատակարարելու մասին պայմանագրերը կնքվել են, օրեր առաջ մամուլի ասուլիսում ասաց ՀՀ պաշտպանության նախարարի պաշտոնակատար Դավիթ Տոնոյանը։ «Մատակարարման վերաբերյալ բանակցությունները ավարտված չեն։ Պայմանագրերը կնքված են, բայց քննարկումները որոշ հարցերով շարունակվում են», – ասաց նա։ Հարցին` արդյոք արդեն զենքը արտադրված է հայկական պաշտպանության վարկով հայկական պատվերի շրջանակում, նախարարն ասաց, որ մի մասն արդեն պատրաստ է։ Մինչ այդ Տոնոյանն ասել էր, որ Ռուսաստանը Հայաստանին 100 միլիոն դոլարի վարկ կտրամադրի։ Նախարարը չասեց` ինչ զենքի մասին է խոսքը։ Ավելի վաղ ՀՀ ֆինանսների նախարարի պաշտոնակատար Ատոմ Ջանջուղազյանն ասել էր, որ Ռուսաստանի պաշտպանային վարկը Հայաստանին կարող է հաստատվել մինչ 2018 թվականի վերջը։ Հիշեցնենք, որ Երևանն արդեն երկու անգամ Ռուսաստանից ժամանակակից ռազմական տեխնիկա գնելու վարկ է ստացել։ Առաջին համաձայնագրի շրջանակում 200 միլիոն դոլարի մատակարարումները ավարտվել են։ Տվյալ պահին արտադրություն ու մատակարարում է ընթանում երկրորդ` 100 միլիոն դոլարանոց համաձայնագրով։ Ավելին, մեզ վստահեցնում են, որ ռուսական 100 մլն վարկի շրջանակներում սպառազինության մատակարարման վերաբերյալ պայմանագրերը կնքված են: Ռուսական կողմի հետ 100 մլն վարկի շրջանակներում սպառազինության մատակարարման վերաբերյալ պայմանագրերը կնքված են, այժմ ընթանում են որոշ բանակցություններ: Պաշտոնական Երևանը նույնիսկ պատասխանում է հարցին, թե մատակարարվելիք սպառազինությունն արդեն արտադրվա՞ծ է: Տոնոյանն ասել է`«մասամբ»։ Սպասենք, թե Հայաստանը երբ ցույց կտա սպառազինության նոր խմբաքանակը: Նախկին իշխանությունից տարբերվելու համար Փաշինյանի կառավարությունը պետք է ցույց տա, թե, նախևառաջ զենքի մատակարարման հարցում ինչ գործարքներ կարող է կնքել ռազմավարական դաշնակից Ռուսաստանի հետ: Թամար Բագրատունի