Օսիպյանի կամքն ու գուշակությունները

Բավական էր, որ Արագածոտնի մարզում Նիկոլ Փաշինյանը մատ թափ տար ոստիկանների վրա, թե՝ չլինեմ-չիմանամ, որ ընտրակաշառքի մասին մամուլը ձեզանից շուտ հաղորդի, եւ ահա, ՀՀ ոստիկանապետ, Փաշինյանի երդվյալ զինակից Վալերի Օսիպյանը ասպարեզ է նետվել՝ հերթական խայտառակությունը թույլ տալով: Օսիպյանը ցանկացել է հանգստացնել Նիկոլ Փաշինյանին, մոտավորապես, այնպես, թե վարչապետ ջան, նման բան չի լինի, մենք առաջինը կիմանանք ու ձեզ կզեկուցենք, բայց ստացվել է ինչպես միշտ: Օսիպյանը ոչ ավել, ոչ պակաս հայտարարել է. «Մենք միշտ վերահսկել ենք և վերահսկում ենք։ Ոստիկանությունը գիտի՝ ով կամ ովքեր կարող են ընտրակաշառքով զբաղվել: Դրա ապացույցը ավագանու ընտրություններ էին։ Այս անգամ ոստիկանությունն էլ ավելի խիստ է լինելու։ Չենք զիջելու որևէ մեկին, հանդուրժող չենք լինլու որևէ մեկի նպատմամբ՝ թե′ կաշառք տվողը, թե′ կաշառք վերցնողը, կապ չունի դա կլինի գումար, ինչ-որ առարկա, իր կամ խոստում, բոլորը ենթարկվելու են պատասխանատվության օրենքի ողջ խստությամբ»: Այսինքն, ոստիկանությունը ոչ միայն վերահսկում է Հայաստանում օպերատիվ իրավիճակը եւ արձագանքում նման դեպքերին, այլեւ կանխագուշակում է, թե ով կամ ովքեր կարող են ընտրակաշաքով զբաղվել: Մեզ էլ մնում է գուշակել՝ Օսիպյանը սուրճի բաժակ է նայում, գիրուղուշ անում, թե նորարարական այլ մոգություններով է զբաղված: Ավելի ծիծաղաշարժ է Օսիպյանի մեկ ուրիշ պնդումը.«Ես վստահեցնում եմ ձեզ, ով ինձ գիտի՝ գիտի, ես՝ Օսիպյանս, կաշկանդված չեմ որևէ մեկից, ով ուզում է լինի>>: Պարոն Օսիպյանի այս հայտարարության զավեշտականությունը նրանում չէ, որ նա Վովա Գասպարյանի նմանությամբ՝ <<Ես Վովան եմ Գասպարյան, սթափվեք գժուկներ>>, ուզում է ասել, թե տեղը բերեք, ես էլ Օսիպյանն եմ ու չեմ կաշկանդվի ընտրակաշառքի դեպքեր բացահայտել անգամ Սյունիքի մարզում, որի ղեկավարը Օսիպյանի նախկին վերակացուն է՝ Հունան Պողոսյանը: Բայց այդ պնդումները տեղում փշրվում են՝ բախվելով մեր ոստիկանապետի <<սկզբունքայնության>> պատին: Եթե այդքան կաշկանդված չէիք, ինչու՞ տուրք տվեցիք Նիկոլ Փաշինյանի քաղաքական նկրտումներին ու չխոսեցիք Սասնա ծռերի համաներման ժամանակ: Դուք ոստիկան մարդ, ծռերը ձեզ թե պատանդ էին վերցրել, թե պոկել ձեր ուսադիրները, կար ավելի սկզբունքային հարց, քան այս հարցում անկոտրում մնալը: Բաց դուք կաշկանդված եք այն պաշտոնում, որը ձեզ շնորհել է Նիկոլ Փաշինյանը, հետեւապես կաշկանդված եք այդ անձի ցանկացած որոշմամբ, դուք չեք մերժել նրա եւ ոչ մի տառը, եթե Փաշինյանը չցանկանա, որ Հունան Պպողոսյանին մոտ գնաք, ապա դուք մի սանտիմետր չեք կարող մոտենալ: Իսկ եթե իսկապես կաշկանդված չեք, ինչ կլինի, պարոն Օսիպյան ջան, գոնե դուք ասեք Նիկոլ Փաշինյանին, որ վարչական ռեսուրսի օգտագործումը պակաս հանցավոր արարք չէ, որքան ընտրակաշառք բաժանելը: Իսկ իր մարզային այցելությունները հենց այդ իրողության վկայությունն են: Ստացվում է, որ պաշտոնական քարոզարշավը մեկնարկում է, երբ իշխող ուժն արդեն ճանապարհի կեսն անցել է։ Քարոզարշավին հատկացված է 12 օր, իսկ «Իմ քայլ»-ը 6 օր առաջ է ընկել։ Ո՞րն է այս ամենի պատճառը․ թերևս այն, որ քարոզարշավը տևելու է ընդամենը 12 օր, և վարչապետը չի հասցնի բոլոր մարզերում լիարժեք պտտվել, ինչը անում է հիմա: Մինչդեռ կարող էր պաշտոնավարման ութը ամիսների ընթացքում մարզեր այցելել, եթե նպատակը իրապես մարզային այցելություններն են: Անի Սահակյան