Ոռոգման ոլորտում վակխանալիա է տիրում. Նիկոլ Փաշինյան

Բնապահպանական հարցերում լինելու ենք շատ նախանձախնդիր: Այս մասին, այսօր՝ նոյեմբերի 22-ին, կառավարության նիստում հայտարարեց ՀՀ վարչապետի պաշտոնակատար Նիկոլ Փաշինյանը: «Հիմա քննարկում են հանքարդյունաբերության հարցը եւ շատ շահարկումներ են լինում դրա հետ կապված: Մենք երբեք չենք ասել, որ հանքարդյունաբերությունը փակելու ենք: Մենք ասում ենք, որ հանքարդյունաբերությունը ՀՀ-ում պետք է իրականացվի ամենաբարձր չափանիշներով: Քայլեր ենք ձեռնարկելու այդպիսի բարձր ստանդարտներ սահմանելու համար»,- ասաց նա: Նիկոլ Փաշինյանը նկատեց, որ երբ իշխանությունները որոշ շրջաններում արգելում են ձկան որսը կամ անտառահատման փորձերը, դա ճիշտ չի ընկալվում այդ տարածաշրջանների բնակիչների կողմից. «Բայց եթե սիգը Սևանում շատ եղավ, մե՞նք ենք գնալու որսանք: Էլի տարածաշրջանի բնակիչներն են շահելու: Ինչ արվում է, այդ տարածաշրջանում մարդկանց շահերից է բխում: Մենք պետք է կարողանանք համոզել, որ անտառ չկտրելով կարելի է ավելի շատ գումար վաստակել, քան՝ կտրելով»,-ասաց նա: Վարչապետի պաշտոնակատարն ընդգծեց, որ այսօրվանից պետք է արձանագրել, որ ոռոգման համակարգի ոլորտում տիրում է վակխանալիա, և այսօրվանից պետք է զբաղվել ոլորտով, որպեսզի նույն տաշտակի առաջ կառավարությունը չկանգնի. «Ինձ զարմացրել է պետական վերահսկողական ծառայության պետի ներկայացրած հաշվետվությունը. կարդում եմ և չեմ հավատում, որ հեկտարներով այգիներ կան, որոնք ջուր են օգտագործում ու չեն վճարում դրա դիմաց: Իմաստ ունի, որ այսօրվանից ստեղծվի աշխատանքային խումբ, որը կզբաղվի ամառվա պիկին ոռոգման խնդրի լուծման հարցերով: ՀԷԿ-երի ոլորտում ի՞նչ է կատարվում. ինչի մասին կարդում ես, բլոքբաստերի տպավորություն է թողնում»: