«Ելք» և «Ծառուկյան» խմբակցությունների պատգամավորները զայրացան

Ազգային ժողովում այսօր քվեարկության դրված նախագծերի մեծ մասը տապալվեց, քանի որ պատգամավորները չմասնակցեցին քվեարկությանը: Մասնավորապես, քվեարկությանը չէր մասնակցում ՀՀԿ-ական պատգամավոր Գալուստ Սահակյանը, ում գրանցումից հետո հնարավոր եղավ ապահովել 53 պատգամավորի ներկայություն և նիստը մեկնարկեց: «Պետական համակարգի մարմինների մասին» ՀՀ օրենքի նախագիծը երկրորդ ընթերցմամբ և ամբողջությամբ ընդունելու հարցի քվեարկությանը, որի արդյունքում 51 կողմ, 1 ձեռնպահ ձայներով նախագիծը չընդունվեց,  չէր քվեարկել Գալուստ Սահակյանը: Այնուհետև քվեարկության դրվեց «Ելքի» պատգամավոր Հրաչյա Հակոբյանի հեղինակած «Գովազդի մասին» ՀՀ օրենքում լրացումներ և փոփոխություններ կատարելու մասին» և «Շահումով խաղերի, ինտերնետ շահումով խաղերի և խաղատների մասին» ՀՀ օրենքում փոփոխություն կատարելու մասին» ՀՀ օրենքի նախագիծը, որով առաջարկվում է սահմանափակել շահումով խաղերի, ինտերնետ շահումով խաղերի, վիճակախաղի գովազդի հեռարձակումը հեռուստատեսությամբ, ռադիոյով և համացանցով: Այս խաղերի գովազդը նախագծի ընդունման դեպքում թույլատրվելու էր իրականացնել գիշերային ժամերին՝ 23:00-06:00-ը: Դահլիճում ներկա պատգամավորներից նորից միայն Գալուստ Սահակյանը չմասնակցեց քվեարկությանը և 52 կողմ ձայնով նախագիծը չընդունվեց: ԱԺ փոխնախագահ Միքայել Մելքումյանը պահանջեց վերաքվեարկության դնել օրենքի նախագիծը, մինչդեռ ԱԺ նախագահ Արա Բաբալոյանը հրաժարվեց՝ նշելով. «Ես կարող եմ դնել վերաքվերակության, եթե չքվեարկած պատագամավորը հայատարարի, որ չի ստացվել քվեարկել: Եթե չի հայտարարում, ուրեմն պրիցիպիալ չի քվեարկել: Ես չեմ կարող ճնշել պատգամավորին»: Մինչդեռ Գալուստ Սահակյանը այս անգամ ևս տեղի չտվեց ու չմասնակցեց քվեարկությանը: Սա առաջացրեց «Ելք» և «Ծառուկյան» խմբակցությունների պատգամավորների զայրույթը: