Օդում մնաց` ձախողելու պատճառների հարցը

Եվրոպական միության հետ հարաբերությունների զարգացումը Հայաստանի արտաքին քաղաքական առաջնահերթություններից մեկն է, ասել է վարչապետի պաշտոնակատար Նիկոլ Փաշինյանն` երեկ ընդունելով Հայաստանում հավատարմագրված Եվրոպական միության անդամ պետությունների դեսպաններին՝ ԵՄ պատվիրակության ղեկավար, դեսպան Պյոտր Սվիտալսկիի գլխավորությամբ: Ըստ կառավարության պաշտոնական կայքէջի, Փաշինյանն ընդգծել է նաև Համապարփակ և ընդլայնված գործընկերության համաձայնագրի կարևորությունը, որն ապահովում է արդյունավետ մեխանիզմներ` զարգացնելու երկկողմ գործընկերությունը և ներքին բարեփոխումները Հայաստանում: Նրա խոսքով՝ համաձայնագրի իրականացման ճանապարհային քարտեզն արդեն իսկ մշակվել է միջգերատեսչական հանձնաժողովի կողմից և փոխանցվել Եվրամիության քննարկմանը: Փաշինյանը հավելել է, որ Հայաստանն այսօր գտնվում է պատմական փոփոխությունների շրջափուլում, իսկ բարեփոխումներն ուղղված են ժողովրդավարության, տնտեսության զարգացմանը, կոռուպցիայի դեմ պայքարին, արդարադատության համակարգի արդիականացմանը, մարդու իրավունքների պաշտպանության ապահովմանը, խոսքի ազատության ամրապնդմանը և այլ ուղղություններին: Նրա խոսքով՝ բոլոր փոփոխությունները և բարեփոխումները հիմնված են հասարակական պահանջի վրա: Նա կարևորել է ԵՄ-ի կողմից Հայաստանում ցուցաբերվող ֆինանսական և տեխնիկական աջակցությունը և համոզմունք հայտնել, որ դրանք նախանշված բոլոր ծրագրերը կդարձնեն ավելի արդյունավետ և առարկայական: Նիկոլ Փաշինյանը նշել է, որ Նոր Հայաստանում կոռուպցիայի դեմ պայքարը և վերը նշված ուղղություններով բարեփոխումները կառավարության համար համարվում են առաջնահերթություն: Անդրադառնալով առաջիկայում անցկացվելիք խորհրդարանական ընտրություններին՝ Փաշինյանն ընդգծել է, որ դրանք կարևոր նշանակություն կունենան Հայաստանում ժողովրդավարության ամրապնդման համար. «Նոր խորհրդարանը և կառավարությունը կառուցված կլինեն հանրային լայն աջակցության և վստահության վրա, ինչը կօգնի ավարտին հասցնել թավշյա հեղափոխությունից սկսած գործընթացը»: Նա ավելացրել է, որ Արևելյան գործընկերությունը ԵՄ-ի հետ Հայաստանի համագործակցության շարժիչ ուժն է, ու մեր երկիրը պատրաստ է անել ամեն ինչ՝ փոխգործակցությունը հնարավորինս արդյունավետ դարձնելու համար: Միևնույն ժամանակ, Փաշինյանը կարևորել է առևտրաշրջանառության և ներդրումների ուղղությամբ համագործակցության ընդլայնումը և համապատասխան քայլերի իրականացումը. «Որքան ավելի արդյունավետ ենք մենք ամրապնդում իրավունքի գերակայությունը և տնտեսության ոլորտում հավասար պայմանների ստեղծումը՝ այնքան լայն հեռանկարներ են ստեղծվում երկկողմ տնտեսական համագործակցության զարգացման և ԵՄ երկրներից ներդրումների ներգրավման համար»: Պյոտր Սվիտալսկին ընդգծել է Հայաստանում տեղի ունեցող դրական փոփոխությունների փաստը և համոզմունք հայտնել, որ դրանք նոր արդյունք կապահովեն Հայաստանի ժողովրդի համար: Դեսպանի խոսքով՝ Համապարփակ և ընդլայնված գործընկերության համաձայնագրի շրջանակում կոնկրետ ուղղություններով ծրագրերի իրականացումը կնպաստի Հայաստանում համապարփակ և ինստիտուցիոնալ բարեփոխումների կյանքի կոչմանը, որոնք նոր թափ կհաղորդեն մեր երկրի զարգացմանն ու առաջընթացին: Պյոտր Սվիտալսկին կարևորել և ողջունել է կառավարության կողմից կոռուպցիայի դեմ պայքարում նպատակային ու հետևողական ծրագրերի իրականացումը, կառավարման համակարգի արդիականացման, մարդու իրավունքների պաշտպանության, խոսքի ազատության ամրապնդման, ներդրումային միջավայրի բարելավման ոլորտներում քայլերն ու ընդգծել, որ ԵՄ-ն պատրաստ է շարունակել աջակցությունը հայաստանյան գործընկերներին: Դեսպանը համոզմունք է հայտնել, որ ԵՄ օժանդակությամբ խորհրդարանական արտահերթ ընտրությունները կանցնեն ազատ, արդար, թափանցիկ: «Մենք սպասում ենք Հայաստանի Հանրապետության պատմության մեջ լավագույն ընտրություններին», - ընդգծել է Պյոտր Սվիտալսկին: Փաշինյանն արդեն ակնհայտորեն ԵՄ-ից կոնկրետ ներդրումներ է ակնկալում՝ հաջողված ընտրությունների անցկացման դիմաց: Նրա կառավարման կես տարին ցույց տվեց, որ հեղափոխական ալիքով՝ ներդրումների բում չի լինելու: Հիմա՝ ընտրություններից հետո նա ձեռքը գցելու է այս ու այն կողմ՝ ներդրումներ բերելու ակնկալիքով, այլապես հեղափոխության «բարիքների» բացակայությունն ակնհայտ է դառնալու: Եվրոպական երկրներն էլ ցույց են տալիս, որ իշխանությանը պատրաստ են օգնել, բայց կոնկրետ բարեփոխումների դիմաց: Իսկ կարևոր հարցը, ինչու վեց ամիսներին Հայաստանի կառավարությունը որևէ տնտեսական արդյունքներ չի գրանցել՝ այդպես էլ մնաց օդում: ՀՀ իշխանությունները մինչ այժմ ամբողջ մեղքն ու պատասխանատվությունը գցում էին նախկին իշխանության վրա: Բայց ոչ ոք այդպես էլ չպատասխանեց հարցին՝ ի՞նչն էր խանգարում Փաշինյանի կառավարությանը նպաստավոր մթնոլորտ ստեղծել ներդրումների իրականացման համար, կամ՝ ի՞նչն է խանգարել դրան մինչ այժմ: Լուրջ, համապարփակ որևէ վերլուծություն չի արվել կառավարության կողմից, պետական որևէ կառույց դրա պատասխանը չունի: Թամար Բագրատունի