«Ցինիկ». Արմեն Աշոտյանը Նիկոլ Փաշինյանի հայտարարությանը
ՀՀԿ-ական Արմեն Աշոտյանն այսօր խորհրդարանում լրագրողների հետ ճեպազրույցում «ցինիկ» որակեց վարչապետի պաշտոնակատար Նիկոլ Փաշինյանի այն հայտարարությունը, թե երկրում 800 հազար մարդ ապրում է 350 հազար աշխատող մարդկանց հաշվին: «Իր ամենացինիկ հայտարարությունը վերջին շաբաթների ընթացքում, որն անգամ մոլի երկրպագուներն են քննադատում, այն էր, որ երկրում կա 800 հազար պորտաբույծ: Կամ այդ մարդը նոր է հասկացել, թե ինչ գործի է անցել, այդ դեպքում վատ է, որ վեց ամիս խաբել է բոլորին, մոլորեցրել է: Դու չես կարող հավակնել մի պաշտոնի, եթե տեսականորեն այդ գիտելիքները չունես»,- ասաց նա: Աշոտյանի խոսքով՝ Նիկոլ Փաշինյանը խորամանկություն է արել, վերջին վեց ամիսներին ոչ մի խնդիր չի լուծվել: «Խեղճ ժողովուրդը հոգնած լինելով և իշխանություններից, և պրոբլեմներից, և ամեն ինչից՝ մտածում էր, որ կա փրկիչ: Փրկիչ չկա, որովհետև փրկիչը մի անգամ եկել է, գնացել է, ով իրեն հավատում է, փրկվում է, ով չէ, չէ: Բայց դա քաղաքականության հետ կապ չունի: Մնացած ամեն ինչը խորամանակություն է»,- նշեց նա:
Հետևեք մեզ Viber-ում
