Փաշինյանին ձեռնտու չէր նոր ԸՕ ընդունումը. Մենուա Հարությունյան

«Պարոն Փաշինյանը շտապեց արտահերթ խորհրդարանական ընտրություններ անցկացնել, որովհետև էյֆորիան նվազում էր»,- այսօր Հայելի ակումբում հայտնեց քաղաքագետ Մենուա Հարությունյանը: Նրա պնդմամբ՝ կառավարության ղեկավարին ձեռնտու չէր նոր Ընտրական օրենսգիրքը: «Եթե նա ցանկանար, նոր օրենսգրքով անցնեին ընտրությունները, ապա կմոբիլիզացներ ուժերը, որպեսզի այն փոխվի: Իր համար գերնպատակ էր արագ ընտրությունների անցկացումը, որը հաջողեց: Բայց կան քաղաքական ուժեր, որոնք պատրաստ չէին, և Փաշինյանը  հնարավորություն չտվեց  պատրաստվել ընտրություններին»: Մյուս բանախոս` Ազատ Դեմոկրատներ կուսակցության վարչության անդամ Նարեկ Այվազյանն էլ հակադարձեց քաղաքագետին` նշելով, որ եթե ՀՀԿ-ն պատրաստ չէր ընտրություններին, ապա դա չի նշանակում, որ այլ ուժերը նույնպես պատրաստ չեն.«Եթե պատրաստ չեք ընտրություններին, ապա մի մասնակցեք: Միայն ձեր անունից խոսեք»: