ՀԱՊԿ-ում կմնանք «մանթրաժ», բայց հպարտ

Հայաստանը Հավաքական անվտանգության պայմանագրի կազմակերպության գլխավոր քարտուղարի թափուր պաշտոնի համար առաջադրելու է պաշտպանության նախկին նախարար Վաղարշակ Հարությունյանի թեկնածությունը, հայտնում է «Արմենպրես»-ի իրազեկ աղբյուրը: Հիշեցնենք, Հայաստանը ՀԱՊԿ ղեկավարությունը պետք է ստանձնի մինչև 2020 թվականը: Յուրի Խաչատուրովն ազատվեց Հավաքական անվտանգության պայմանագրի կազմակերպության գլխավոր քարտուղարի պաշտոնից նոյեմբերի 2-ին: Հավաքական անվտանգության պայմանագրի կազմակերպության գլխավոր քարտուղարի պարտականությունների կատարումը դրվել է կազմակերպության գլխավոր քարտուղարի տեղակալ Վալերի Սեմերիկովի վրա: Առհասարակ, Մոսկվան Հայաստանի դիրքորոշումը համարեց, ոչ ավել, ոչ պակաս, հարված կազմակերպության իմիջին: Հայաստանի իշխանությունը Մարտի 1-ի հարցով ոչ թե նախ փորձեց հետ կանչել Խաչատուրովին, որից հետո գործ հարուցեր, այլ հակառակ ուղղությամբ առաջ շարժվեց, ինչն էլ Մոսկվայի զայրույթը հարուցեց: Հիմա Հայաստանը ցույց է տալիս, թե ոչինչ չի պատահել, ամեն ինչ իր հունով է ընթանում: Ներկայացվում է Վաղարշակ Հարությունյանի թեկնածությունը, ըստ ամենայնի Հայաստանի իշխանությունները հույս ունեն, թե Վ. Հարությունյանը ընդունելի կերպար է Ռուսաստանի համար: Եթե անգամ Մոսկվայի համար Հայաստանը ներկայացնի այս կամ այն ընդունելի կերպարին, միևնույն է՝ կա կազմակերպության անդամ պետությունների դիրքորոշումը, որը պարզ է, որ ի օգուտ Հայաստանի չի լինելու: Նշանակում է, որ Հայաստանը առաջիկա օրերին կարող է կորցնել ՀԱՊԿ-ում գլխավոր քարտուղարի պաշտոնը: Իսկ կհամարվի Հայաստանի դիվանագիտական ձախողում, թեև այդ կառույցը Հայաստանի համար առանձնապես հայանպաստ որոշումներով ու դիրքորոշումներով չէր էլ փայլում: Ինչևէ, նախօրեին «Կոմերսանտը» հայտնել է, որ ՀԱՊԿ-ում քննարկվում է գլխավոր քարտուղարի պաշտոնում Բելառուսի Անվտանգության խորհրդի պետական քարտուղար Ստանիսլավ Զասի նշանակման հարցը: «Վերջնական որոշումը դաշինքի անդամ երկրների ղեկավարները կկայացնեն նոյեմբերի 8-ին։ Ինտրիգն այստեղ այն է, որ ազատված պաշտոնին ձգտում է Հայաստանը, որի շնորհիվ էլ հենց այդ թափուր տեղը առաջացել է»,-ասված է հոդվածում։ «Կոմերսանտ»-ի դիվանագիտական աղբյուրները կազմակերպության երեք երկրներում նշում են, որ ամենայն հավանականությամբ նոր գլխավոր քարտուղարը հաջորդող երեք տարիներին կլինի Բելառուսի ներկայացուցիչը։ ՀԱՊԿ-ում, աղբյուրների խոսքով, որոշել են նշանակել քարտուղարության լիարժեք ղեկավարի, որոշվել է ղեկավարվել ռոտացիայի սկզբունքով, որի համաձայն՝ Հայաստանից հետո, ըստ այբբենական կարգի, գլխավոր քարտուղար պետք է նշանակվի Բելառուսի ներկայացուցիչը։ Փաստացի, մինչև նոյեմբերի 8-ը՝ «Կոմերսանտ»-ը առավել հավանական թեկնածու գլխավոր քարտուղարի պաշտոնում նշում է Բելառուսի Անվտանգության խորհրդի պետական քարտուղար Ստանիսլավ Զասին։ 54-ամյա գեներալ-մայոր Զասը 2015-ից գլխավորում է Բելառուսի Անվտանգության խորհուրդը և լավ ծանոթ է ՀԱՊԿ աշխատանքին՝ նա ի պաշտոնե ներառված է ՀԱՊԿ անվտանգության խորհուրդների քարտուղարների կոմիտեի կազմում։ Հայտնի է, որ ՀԱՊԿ առաջիկա գագաթնաժողովում նաև քննարկվելու է ՀԱՊԿ-ի բարեփոխման հարցը: Այդ մասին ասել է Բելառուսի նախագահ Ալեքսանդր Լուկաշենկոն՝ երեկ Մինսկում ընդունելով Ղազախստանի խորհրդարանի վերին պալատի՝ Սենատի նախագահ Քասիմ-Ջոմարտ Տոկաևին: Բելառուսի նախագահի լրատվական ծառայության փոխանցմամբ, Լուկաշենկոն ասել է. - «Մի քանի օրից մենք կհանդիպենք Աստանայում, Հավաքական անվտանգության պայմանագրի կազմակերպության գագաթնաժողովն է: Հարցերը շատ են, այդ կազմակերպության բարեփոխումը, միջազգային ասպարեզում նրա կշռի ու դերակատարության ամրապնդումը, հատկապես այս բարդ ժամանակաշրջանում»: ՀԱՊԿ գագաթնաժողովն Աստանայում անցկացվելու է նոյեմբերի 8-ին: Առավոտյան հանդիպելու են ՀԱՊԿ անդամ երկրների արտգործնախարարները, կեսօրից հետո՝ երկրների ղեկավարները: Թամար Բագրատունի