Գերմանիայում հայերի և ՀՀ դեսպանի մասին սկանդալային հրապարակում է եղել.hetq.am (լուսանկար)

Գերմանական «Շպիգել» հանդեսը եւ «MDR» հեռուստաընկերությունը երեկ աղմկահարույց հետաքննություն են հրապարակել Գերմանիայում հայկական մաֆիոզ խմբավորումների մասին: Լրագրողները տեղեկացել են, որ դաշնային քրեական ոստիկանությունը (BKA) եւ 6 երկրամասերի քրեական ոստիկանները (LKA) իրականացրել են գաղտնի հատուկ գործողություն, որը կոչվել է «FATIL» (Fight against thieves in law–պայքար «օրենքով գողերի» դեմ): Ոստիկաններին աջակցել են նաեւ Գերմանիայի դաշնային հետախուզական ծառայությունն (BND) ու Եվրոպոլը: Ինչպես ասվում է լրագրողական հետաքննության մեջ, այս գործողության շրջանակներում իրավապահները փորձել են բռնել հայկական մաֆիայի անդամներին, բայց առանձնապես հաջողության չեն հասել: Ըստ հրապարակման՝ Գերմանիայում հայկական մաֆիոզ խմբավորումները կառավարվում են «օրենքով գողերի» կողմից, որոնք ռուսաստանյան-եվրասիական հանցավոր շրջանակներից են: Հայերով ոստիկանները սկսել են հետաքրքրվել 2014 թ. հուլիսին Թյուրինգիա երկրամասի մայրաքաղաք Էրֆուրտում տեղի ունեցած միջադեպից հետո: Երկու հանցավոր կլանների միջեւ գիշերային փոխհրաձգությունից միայն 3 տարի անց Էրֆուրտի դատարանը կրակողներից մեկին դատապարտել է մի քանի տարվա ազատազրկման, իսկ չորս հոգու պայմանական բաց է թողել: Այս միջադեպից հետո բախումները հայկական խմբավորումների մեջ շարունակվել են՝ հարձակում հայի պատկանող ռեստորանի վրա, ծեծկռտուք եւ այլն: Քննիչներից մեկը լրագրողներին պատմել է, որ հայկական խմբավորումներն աչքի են ընկնում առանձնակի դաժանությամբ: Էրֆուրտի կրակոցներից հետո 14 քրեական գործ էր բացվել 42 հոգու դեմ, որոնք կասկածվում էին ֆինանսական մեքենայությունների մեջ: «Շպիգելի» փոխանցմամբ՝ դաշնային քրեական ոստիկանները նշել են, որ իրենց երկրում «իսկապես գոյություն ունի» հայկական մաֆիա:Վերջինս, ըստ իրավապահների, ռուսաստանյան-եվրասիական շրջանակների պես «էական ֆինանսական» ռեսուրսների է տիրապետում եւ կարող է «սպառնալ իրավական պետության հիմքերին»: Այդուհանդերձ, իրավապահներն առայժմ բավականաչափ ապացույցներ չեն կարողանում գտնել, ինչը հիմք կդառնա մեղադրանք առաջադրելու համար: Էրֆուրտյան միջադեպի մեջ ոստիկանները կասկածել են նաեւ Գերմանիայում բնակվող հայտնի հայ բռնցքամարտիկ Կարո Մուրատին, ով սակայն հերքել է իր մասնակցությունը՝ նշելով, որ այդ ժամանակ եղել է Բեռլինում: Նրա եղբայրը՝ Կոկո Մուրատը, հայտնել է, թե տեսախցիկների նկարահանած կադրերում երեւում է ինքը, սակայն միջադեպի վայրում հայտնվել է պատահաբար: Ոստիկանները չեն կարողացել եղբայրների դեմ բավարար ապացույցներ գտնել: Գերմանացի իրավապահները մաֆիայի հետ կապ ունենալու առումով որոշակի կասկածներ են ունեցել եւս մեկ աշխարհահռչակ հայազգի բռնցքամարտիկի՝ այդ երկրում բնակվող Արթուր Աբրահամի հանդեպ: Աբրահամը, ըստ «Շպիգելի», իրեն ուղղված մեծաթիվ հարցերին չի պատասխանել: Հետաքրքիր է, որ գերմանացի իրավապահներին հայկական մաֆիայի դեմ պայքարում օգնություն է առաջարկել 2015 թվականից այդ երկրում ՀՀ արտակարգ եւ լիազոր դեսպան Աշոտ Սմբատյանը (սա, ըստ գերմանացի լրագրողների, տեղի է ունեցել այս տարվա մարտին, երբ դեսպանը հանդիպել է Թյուրինգիայի ներքին գործերի նախարար Գեորգ Մայերին), սակայն դաշնային քրեական ոստիկանությունը իր գործընկերներին խորհուրդ է տվել չհամագործակցել հայկական կողմի հետ, քանզի նրանք կասկած են ունեցել, որ հայկական իշխանությունները կապված են «օրենքով գողերի» հետ: Պարզվում է՝ Ա. Սմբատյանի հանդեպ նույնպես որոշակի կասկածներ են եղել: Մասնավորապես, դաշնային հետախուզությունը 2008-ին գաղտնի թղթապանակում նշել է, որ Սմբատյանը կասկածվում է «օրենքով գող» եւ մաֆիայի պարագլուխ լինելու մեջ: Մեր կողմից հավելենք, որ 1997-2008 թթ. Սմբատյանը եղել է ՀՀ դեսպանության գրասենյակի վարիչ: Այդուհանդերձ, դաշնային քրեական ոստիկանությունը չի կարողացել հաստատել հետախուզական ծառայության 2008 թ. տեղեկությունը Սմբատյանի դեմ: Նշվում է նաեւ, որ նա Ինտերպոլով որպես այդպիսին չի անցել: Սակայն Սմբատյանի հանդեպ գերմանացի իրավապահների հետաքրքրությունը պարբերական բնույթ է կրել. 2005-ին Բեռլինի դատախազությունը նրան կասկածել է փողերի լվացման մեջ, բայց ապացույցները կրկին անբավարար են եղել: Ինքը՝ դիվանագետը, լրագրողների հարցերին ի պատասխան՝ նշել է, որ նման մեղադրանքները բամբասանքներ են, իսկ իր «օրենքով գող» լինելու մասին պնդումը՝ անհեթեթյուն: Քրեական ոստիկանության «FATIL» գործողությունը ավարտվել է, ամփոփիչ փաստաթղթում նշվում է, որ քրեական հեղինակությունները եւ «օրենքով գողերը», ըստ էության, սփռված են ողջ Եվրոպայում եւ փոխկապակցված են միմյանց: Նրանց դեմ պայքարելու համար, ըստ գերմանացի իրավապահների, անհրաժեշտ է միջոցներ ձեռնարկել համաեվրոպական մակարդակով: «Հետքը» գրավոր հարցեր էր ուղղել ԱԳ նախարար Զոհրաբ Մնացականյանին: Պատասխանները ստացել են ԱԳՆ մամուլի խոսնակ Աննա Նաղդալյանից: -Երեկ գերմանական «Շպիգել» հանդեսը հոդված է հրապարակել հայկական քրեականկլանների բախման եւ դրանց հանդեպ գերմանական իրավապահների հետաքննությանմասին: Հոդվածում շոշափվում է նաեւ Գերմանիայում ՀՀ արտակարգ եւ լիազոր դեսպանԱշոտ Սմբատյանի անունը,որի հանդեպ գերմանացի իրավապահները հետաքրքրություն ենցուցաբերել դեռ 2008-ից: Նույնիսկ տեղեկություն կա նրա՝ հավանական «օրենքով գող» լինելու մասին: Ավելին՝ դաշնային ոստիկանությունը, պատճառաբանելով Հայաստանում«օրենքով գողերի» եւ իշխանության սերտ կապերը, գերմանական կառույցներին կոչ է արելչհամագործակցել հայկական կողմի հետ՝արձագանքելով դեսպան Սմբատյանի՝ հայկականմաֆիայի դեմ պայքարին աջակցելու պատրաստակամությանը: Խնդրում եմ հայտնել, թե ՀՀ ԱԳՆ-ն նշված հոդվածից հետո ինչպիսի քայլեր է ձեռնարկել կամ պատրաստվումձեռնարկել: -ԱԳՆ-ն կապի մեջ է գերմանական պատկան մարմինների հետ՝ մամուլում հայտնված պնդումների արժանահավատությունը ճշտելու համար: Հաշվի առնելով հարցի նրբությունը եւ հավանական ազդեցությունը մեր դիվանագիտական ներկայացուցչության բնականոն աշխատանքի վրա՝ ներկայումս նպատակահարմար չենք գտնում լրացուցիչ մեկնաբանություն տալը: Հավելյալ տեղեկություն կհայտնենք ըստ արդյունքների: -Նախարարությունը եւ անձամբ Դուք արդյոք տեղեկացվել եք, որ 2015-ից դեսպանիպաշտոնը զբաղեցնող Ա. Սմբատյանի հանդեպ օտարերկրյա իրավապահներըհետաքրքրություն են ցուցաբերել: -Ոչ: -Արդյոք «թավշյա հեղափոխությունից» հետո գերմանական կողմը դիմել է ՀՀ ԱԳՆ-ինհայկականմաֆիայի դեմ պայքարում համագործակցության առաջարկով: -Ոչ: «Հետք»