Գյանջայում իրավիճակն անվերահսկելի է դարձել

Քաղաքագետ Գագիկ Համբարյանը ֆեյսբուքյան իր էջում գրել է. «Իրավիճակն Ադրբեջանի մեծությամբ երկրորդ քաղաքում կրկին սրվել է: Ադրբեջանական ԶԼՄ-ները, որոնք հիմնականում ներկայացնում են պաշտոնական տեսակետը, կցկտուր տեղեկություններ են հաղորդում Գյանջայից: Ըստ Ադրբեջանի ԱԱԾ-ի տվյալների` հատուկ գործողության ժամանակ սպանվել է երկու մարդ՝ Ֆամիլ Ալեկփերովը և Ռուստամ Ռզաևը, որոնք պաշտոնական Բաքվի կողմից ներկայացվում են որպես կրոնական ծայրահեղական կազմակերպության անդամներ և ահաբեկիչներ: Ադրբեջանի ԱԱԾ-ն տեղեկացրել է, որ այդ երկու ծայրահեղականները նախապատրաստել են ահաբեկչություններ կազմակերպել երկրի տարբեր մասերում, սակայն իրավապահներին հաջողվել է դրանք կանխել և ոչնչացնել կազմակերպիչներին:

     Թե ինչ է իրականում տեղի ունեցել Գյանջայում, պարզ չէ, քանի որ ընդդիմադիր կայքերը դեռ չեն մեկնաբանել տեղի ունեցածը... Հիշեցնեմ, որ իրավիճակն Ադրբեջանի մեծությամբ երկրորդ քաղաքում սրվեց սույն թվականի հուլիսի 3-ին, երբ մահափորձ տեղի ունեցավ Գյանջայի քաղաքապետ Էլմար Վելիևի դեմ: Ազերի իրավապահները ձերբակալեցին 11 անձի և մահափորձի կազմակերպման համար մեղադրեցին ՌԴ քաղաքացի Յունիս Սաֆարովին, ում մեղադրեցին նաև Իրանի գաղտնի ծառայությունների գործակալ լինելու համար: Իշխանությունները «վհուկների որս» սկսեցին քաղաքում` տարրական տեռոր իշխանությունների հետ չհամագործակցող ուժերի նկատմամբ....Այս տեռորի պայմաններում էլ Գյանջայի բնակիչներից ոմանք (պաշտոնական տեղեկությունների համաձայն 150-200 հոգի) հուլիսի 10-ին հանրահավաք էին կազմակերպել Գյանջայի քաղաքապետարանի մոտ: Չարտոնված հանրահավաքը ցրելու հետևանքով զոհվել են երկու բարձրաստիճան ոստիկան-գնդապետներ՝ Իլգար Բալաքիշիևը և Սամեդ Աբբասովը: Այդ ամենը պատճառ դարձավ, որ Ադրբեջանի իշխանություններն սկսեն մասսայական ձերբակալություններ, որոնց ժամանակ սպանվեցին ահաբեկչության համար կասկածվող մի քանի մարդ:

     Այժմ իրավիճակը, որքան հասկանում եմ, կրկնվում է: Ապշերոնյան բռնապետը շատ պարզ քաղաքականություն է վարում իրեն խիստ քննադատողների նկատմամբ. նրանց մեղադրում է ահաբեկչության համար և հրամայում ֆիզիկապես ոչնչանցնել: Չկա ընդդիմադիր, չկա և խնդիր: Ինչպես նաև այս մեթոդով Ալիևը վախեցնում է ապագայում իրեն քննադատողներին՝ սպառնալով սպանությամբ: Սակայն նույնիսկ այդ ամենից և Վելիևի` քաղաքապետի պաշտոնը լքելուց հետո իշխանություններին չի հաջողվում իրավիճակն ամբողջությամբ վերահսկել Գյանջայում:

     Հ.Գ. Չի բացառվում, որ ԱՄՆ նախագահի օգնական Բոլթոնի տարածաշրջան այցից հետո այս երկու սպանված «ահաբեկիչներին» պաշտոնական Բաքուն ներկայացնի որպես իրանական գործակալներ՝ ևս մեկ անգամ «ապացուցելով» Վաշինգթոնի այն թեզը, որ Իրանն ահաբեկիչներին հովանավորող երկիր է»: