Նիկոլ Փաշինյանը կարիերիստների խմբաքանակ է «ներմուծում»
«Լուսավոր Հայաստան» կուսակցության արդեն նախկին անդամ Հայկ Կոնջորյանը հայտարարել է, որ լքում է կուսակցությունը: Նա կանդամագրվի Նիկոլ Փաշինյանի Քաղաքացիական պայմանագիր կուսակցությանը եւ կընդգրկվի կուսակցության ընտրացուցակում: <<Այս որոշումը պայմանավորված է կուսակցության ապագա գործունեության շուրջ իմ ունեցած մոտեցումների տարբերությամբ:…Ուստի, ես իմ ուղղակի և անվերապահ աջակցությունն եմ հայտնում Նիկոլ Փաշինյանին և հեղափոխությանը Հայաստանի համար այս բախտորոշ ժամանակներում և իմ քաղաքական գործունեությունը իրականացնելու եմ հեղափոխության թիմի հետ միասին, որովհետև մեր պետության նավը դուրս է եկել ծով, որը լի է փոթորիկներով և ծովահեններով, իսկ առագաստը պիտի պահել ամուր, որովհետև նավը պիտի հասնի մեր երազանքների ափին>>,- իր հայտարարության մեջ նշել է Կոնջորյանը: Հիշեցնենք, որ Կոնջորյանը պատգամավոր դարձավ, երբ Մանե Թանդիլյանը հեղափոխությունից հետո տեղափոխվեց գործադիր:Հետաքրքիր է, որ այս ծպտյալ հեղափոխականը հեղափոխության թեժ օրերին չմիացավ քայլարշավին, հավանաբար այն պատճառով, որ Լուսավոր Հայաստանը դեմ էր Նիկոլ Փաշինյանի ծրագրին: Երբ հեղափոխությունն արդեն իրողություն է, նա համարում է, որ պետք է լքի իր նավակը եւ անցնի ավելի ապահով նավակ: Հայաստանի քաղաքական դաշտում Հայկ Կոնջորյանի պես նպատակասլաց երիտասարդների պակաս մենք որեւէ ժամանակում չենք ունեցել եւ ապագայում էլ չենք ունենա: Վահան Բաբայանը աչքներիս առաջ է մեծացել, նա հասցրել է հինգ կուսակցություն փոխել, քանի որ միայն այդպես հնարավոր դարձավ ի վերջո Ծառուկյանի հովանու ներքո մանդատ ստանալ: Հայկ Կոնջորյանն էլ երիտկարիերիստ է, իսկ նոր իշխանություններն ապագայում այդպիսինների կարիքը շատ են զգալու, եւ այն էլ այսպիսի սնանկ կադրային բազայով իշխանությունների համար նման բոցաշունչ ելույթներ ունեցող երիտասարդները գտնված պատգամավորացուներ են: Տեղեկություններ կան, որ իշխանությունը այդպիսի խմբաքանակ է հավաքում եւ առաջիկայում Լուսավոր Հայաստանից չի բացառվում, որ ուրիշ հեռացողներ եւս լինեն: Փաշինյանի երբեմնի դաշնակից այս կուսակցությունում զայրացած են, Նիկոլ Փաշինյանը մտադիր է ոչնչացնել այս կուսակցությունը, իսկ դա նրանց մոտ կասկածներ է առաջացրել, որ ընտրությունների ելքն արդեն իսկ կանխորոշված է: Նոր իշխանությունները նույնիսկ հաշվի չեն առնում գործընկերների հետ անցած ճանապարհը, ի վերջո, 2017-ին նրանք համատեղ ջանքերով են խորհրդարան մտել, շահարկվում էր նաեւ Էդմոն Մարուքյանի եւ նախկին իշխանությունների կապը, ինչի շնորհիվ Ելք-ի նկատմամբ բարեգթություն դրսեւորվեց: Նիկոլ Փաշինյանի կուսակցությունը ըստ էության դրսեւորվում է որպես տիպիկ իշխանական կուսակցություն, որտեղ կհանգրվանեն բոլոր նրանք, ովթեր ինչ-որ բանի ակնկալիք ունեն: Նույնիսկ ՀՀԿ-ում են նրանք հոգեւորսությամբ զբաղված եւ մոտ ապագայում նախկին իշխանություններից նույնպես արտագաղթ կլինի: Անի Սահակյան
Հետևեք մեզ Viber-ում
