Տիգրան Ուրիխանյանը, Մարտուն Գրիգորյանը եւ ուրիշներ Նիկոլի մոտ միջնորդ են գտել

Երբ հայտնի դարձավ, որ արտահերթ ընտրությունները ռեյտինգային ընտրակարգով են անցնելու, քաղաքական մի խումբ գործիչների եւ կուսակցությունների մոտ անհանգստություն է առաջացել: Մասնավորապես այն կատեգորիայի, որոնք առանց կուսակցության են մնացել, կամ նախկին իշխանություններին չեն ինտեգրվել, կամ էլ փոքր շանս ունեցող կուսակցություններում են հանգրվանել: Անցած տարվա ընտրությունները աչքի առաջ ունենալով, նրանք եկել են այն հանգրվանի, որ ուժեղ թիմի հետ պետք է ռեյտինգային թեկնածություն առաջադրել: Մի քանի օր է Նիկոլ Փաշինյանի հետ միջնորդական առաքելություն ունեցող պաշտոնյաների մոտ հերթեր են գոյացել, միջնորդներն են առաջին փոխվարչապետ Արարատ Միրզոյանը, ԱԺ պատգամավորներ Սասուն Միքայելյանը եւ Ալեն Սիմոնյանը: Մեզ հայտնի է դարձել, որ նրանց հետ փորձում են հանդիպումներ ունենալ օրինակ Տիգրան Ուրիխանյանը, Մարտուն Գրիգորյանը, Տաճատ Վարդապետյանը եւ այլոք: ՀԳ. Մենք կապ հաստատեցինք «Ալյանս» կուսակցության առաջնորդ Տիգրան Ուրիխանյանի օգնական Վարդան Քոչարյանի հետ, ով նշեց, որ իշխանության հետ որևէ բանակցություն չեն ունեցել: