ԵՄ-ն նախատեսում է ներդրում կատարել

ԵՄ-ն շարունակելու է աջակցել Հայաստանի գյուղատնտեսության ոլորտի առաջընթացին: ՀՀ ներկայիս կառավարության հետ քննարկվում է հյուսիսային մարզերում օրգանական գյուղատնտեսության ոլորտում ներդրումներ կատարելու վերաբերյալ ծրագիր: «Արմենպրես»-ի հաղորդմամբ՝ Վայոց ձորի մարզում լրագրողների հետ ճեպազրույցում այս մասին հայտնեց Հայաստանում ԵՄ դեսպան Պյոտր Սվիտալսկին: «ԵՄ-ն հանդիսանում է Հայաստանի գյուղատնտեսության ոլորտի ամենամեծ դոնորը: Մենք հանձն ենք առել շարունակել այդ աջակցությունը: Մենք հավատում ենք, որ Հայաստանի օրգանական գյուղատնտեսությունը կարող է մեծ առաջընթաց ապահովել Հայաստանի համար, հավատում ենք, որ հայկական գյուղմթերքը կարող է տարբեր երկրների շուկաներ մուտք գործել: Մենք նոր կառավարության հետ քննարկումներ ունենք, որոնք վերաբերում են 2018 թ. գյուղատնտեսական ռազմավարությանը: Գյուղատնտեսական ոլորտը առաջնային հարցերից մեկն է: Մենք քննարկում ենք տարբեր գաղափարներ, այդ թվում նաև Հայաստանի հյուսիսային մարզերում՝ Տավուշում, Շիրակում և Լոռիում օրգանական գյուղատնտեսական ոլորտում ներդրումներ կատարելու մասին հարցը»,-ասաց Սվիտալսկին ու հույս հայտնեց, որ մոտակա ամիսներին կավարտեն այդ քննարկումները: «Օրգանական գյուղատնտեսության աջակցության նախաձեռնություն» ԵՄ ծրագիրը մոտենում է ավարտին, սակայն Սվիտալսկին վստահեցրեց, որ կշարունակեն աջակցել Հայաստանին՝ առաջընթացի համար: