Մարզպետի նախկին ՀՀԿ-ական խորհրդականը, ով Ադրբեջանից ապաստարան էր խնդրել, գիրք է գրել Նիկոլ Փաշինյանի մասին
Տամուշի մարզի Իջևան համայնքի համայնքապետարանի հովանավորությամբ լույս է տեսել «Իջևան Մոլորակից իջած փրկիչը» գիրքը, որը նվիրված է ՀՀ վարչապետի պաշտոնակատար Նիկոլ Փաշինյանին, գրքի հեղինակը Լյուբիկ Չիբուխչյանն է։ Այս մասին տեղեկանում ենք Իջևանի քաղաքապետարանի ֆեյսբուքյան էջից։ Իջևանի համայնքապետ Վարդան Ղալումյանից փորձեցինք ճշտել, թե ինչո՞ւ է համայնքապետարանը հովանավորել նման վերնագրով գրքի տպագրությունը, ի՞նչ հովանավորչության մասին է խոսքը, և իրո՞ք քաղաքապետ Ղալումյանը կիսում է կարծիքը, որ Փաշինյանը «Իջևան Մոլորակից իջած փրկիչն» է։ Քաղաքապետը «Հրապարակ»-ի հետ զրույցում ասաց, որ համայնքապետարանի հովանավորությամբ չի տպագրվել «Այդ գրքի հետ կապված Իջևանի համայնքապետարանը որևէ ֆինանսավորում չի արել, դա Իջևանի «Ավանդույթն» է արել, պա՞րզ է, զանգեք «Ավանդույթի» տնօրենին»։ Բայց համայնքապետարանի ֆեյսբուքյան էջում է տեղադրված․«Բոլոր աշխատանքներն էլ տեղադրվում են պաշտոնական էջում, մնացածի մասին կասի աշխատակազմի ղեկավարը»,- ասաց համայնքապետ Ղալումյանը, իսկ աշխատակազմի ղեկավար Բորիս Թանանյանը տեղում չէր։ Իսկ Իջևանի «Ավանդույթ» երաժշտական դպրոց ՊՈԱԿ-ից մեր զանգերին չպատասխանեցին։ Հատկանշական է, որ գրքի հեղինակ Լյուբիկ Չիբուխչյանը Տավուշի մարզի նախկին խորհրդական է, Հանրապետական կուսակցության անդամ։ Նա ժամանակին ասել էր, որ ՀՀ իշխանությունները իրեն չեն գնահատում, քանի որ ինքը երեք տարեկանում ստեղծել է տառեր, չորս տարեկանում՝ գիրք հրապարակել, այնուհետեւ ստեղծել «չիբու» մարտարվեստ, նա քաղաքական ապաստան ստանալու համար դիմել էր Ադրբեջանին․ «Ինձ չեն գնահատում: Չգիտեն, թե ինչ են կորցնում: Ես այս մոլորակի ամենատաղանդավոր մարդն եմ, ինձ նմանը չկա: Երեք տարեկանում ստեղծել եմ տառերը, կարող եք գալ ու կաբինետում տեսնել դրանք: Չորս տարեկանում գիրք եմ հրապարակել: Ստեղծել եմ մարտարվեստ՝ «չիբու» անունով: Ավելի քան 170 գրքերի հեղինակ եմ, Հայաստանի համար այսքան բան եմ արել ու ինձ չեն գնահատում»,- ասել էր նա։
Հետևեք մեզ Viber-ում
