Ողբերգական դեպք Արարատի մարզում

Այսօր՝ հոկտեմբերի 29-ին, ողբերգական դեպք է տեղի ունեցել Արարատի մարզում։ Ժամը 12։20-ի սահմաններում Ոստիկանության Արտաշատի բաժին ահազանգ է ստացվել, որ Շահումյան գյուղի տներից մեկի դիմացով անցնող ջրատարում դի կա։ Ինչպես հայտնում է ֆոտոլրագրող Գագիկ Շամշյանը, դեպքի վայր են ժամանել Ոստիկանության Արարատի մարզային վարչության օպերատիվ խումբը՝ մարզի ոստիկանապետ, Ոստիկանության գնդապետ Արմեն Գասպարյանի, Ոստիկանության Արտաշատի բաժնի օպերատիվ խումբը՝ բաժնի պետ, Ոստիկանության գնդապետ Արթուր Հովհաննիսյանի գլխավորությամբ։ Ժամանել են նաև արտակարգ իրավիճակների նախարարության փրկարար ծառայության Արտաշատի հրշեջ-փրկարարական ջոկատը՝ 1 մարտական հաշվարկով։ Փրկարարներն ու ոստիկանները չգործող ջրատարից դուրս են բերել նույն գյուղի բնակիչ՝ 77-ամյա Ալեքսանդր Ավագյանի դին։ Դատաբժշկի նախնական եզրակացության համաձայն՝ դիակի վրա բռնության հետքեր չեն հայտնաբերվել։ Ըստ նախնական տեղեկությունների՝ Ա. Ավագյանը ծառի ճյուղեր բերելու ժամանակ հանկարծամահ է եղել։ Օպերատիվորեն ժամանել են նաև Հայաստանի քննչական կոմիտեի Արարատի մարզային քննչական վարչության խումբը՝ հատկապես կարևոր գործերով ավագ քննիչ Միշա Ղազարյանի գլխավորությամբ։ Փաստի առթիվ նյութեր են նախապատրաստվում։ Քննիչի որոշմամբ նշանակվել են մի շարք փորձաքննություններ,այդ թվում՝դիակի դատաբժշկական։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: