Ռուդոլֆ Ջուլիանի. «Դա հեղափոխություն չէր, դա վարչակազմի խաղաղ փոփոխություն էր»

Նյու Յորքի նախկին քաղաքապետ, ԱՄՆ նախագահ Դոնալդ Թրամփի խորհրդական Ռուդոլֆ Ջուլիանին «Հեռանկարի» տաղավարում խոսելով հայաստանյան ներքաղաքական զարգացումների մասին՝ հայտարարել է․ «Ես զարմացած էի, որ դա բնութագրվում էր որպես հեղափոխություն: Հեղափոխությունն, ըստ իս, զինված հակամարտության նման մի բան է, ինչպիսին մենք ունեցել ենք բրիտանացիների դեմ: Սա վարչակազմի խաղաղ փոփոխություն էր, սա ներքին հարց է: Ես մանրամասները չգիտեմ, իմ կարծիքով՝ դա հեղափոխություն կոչելը կտրուկ է, իսկ կառավարության փոփոխությունը շատ տարածված է: Մենք վերջերս կառավարության փոփոխություն ենք ունեցել Բարաք Օբամայից նախագահ Թրամփի, Իտալիայում կառավարությունը փոխվում է երկու շաբաթը մեկ անգամ: Ուստի, որպես իտալացի և ամերիկացի, ես սովոր եմ նրան, որ կառավարությունները ողջ աշխարհում տարբեր են: Ես դրա վերաբերյալ կարծիք չունեմ, բացի նրանից, որ նման բաներ տեղի են ունենում՝ կառավարության փոփոխություններ: Հուսով եմ՝ սա օրինական փոփոխություն է, կարծում եմ՝ դա ընտրությունների միջոցով կվավերացվի, ինչը շատ լավ կլինի»: