Պուտինն, ամեն դեպքում, դուռը բաց է պահում Ալիևի համար
Մայիսին կայացած Եվրասիական տնտեսական բարձրագույն խորհրդի նիստին, որին մասնակցել է ՀՀ վարչապետ Նիկոլ Փաշինյանը, հաստատվել է զեկույց՝ Հայաստանի անդամակցության նախնական արդյունքների վերաբերյալ, երեկ հայտարարել է Եվրասիական տնտեսական հանձնաժողովի՝ ինտեգրման և մակրոտնտեսական հարցերով կոլեգիայի անդամ (նախարար) Տատյանա Վալովայան։ «Շատ դրական արդյունքներ են։ Մեզ մոտ ամեն ինչ ընթանում է առաջվա նման՝ շատ ակտիվ և ոչ մի խնդիր, բնականաբար չկա», - «Եվրասիական շաբաթ» միջազգային ֆորումի շրջանակներում լրագրողների հետ զրույցում ասել է Տ. Վալովայան։ Իսկ ահա գալով ԵԱՏՄ-ին Ադրբեջանի անդամակցության թեմային՝ ռուսական կողմից ուշագրավ հայտարարություններ են հնչել: Ադրբեջանի անդամակցության հարցը ԵԱՏՄ-ին օրակարգում չէ, նույն ֆորումի ամփոփիչ ասուլիսում ասել է նա: «Միայն կարող եմ ասել, որ հարցը մեր օրակարգում չէ», - Aysor.am-ի հարցին ի պատասխան հավելել է Վերոնիկա Նիկիշինան: Բայց ուշագրավն այն է, որ երեկ ավելի վաղ ԵԱՏՄ-ին Ադրբեջանի անդամակցության հնարավորության մասին հարցին ի պատասխան Ռուսաստանի նախագահի խորհրդական Սերգեյ Գլազևն էլ այլ տեսակետ է հայտնել: Նա ոչ ավել, ոչ պակաս հայտարարել է, որ ղարաբաղյան հակամարտության համատեքստում Ադրբեջանի անդամակցությունը ԵԱՏՄ-ին հնարավոր է, ապա հավելել է, որ բոլոր հետխորհրդային երկրների մուտքը Եվրասիական տնտեսական միություն կկրճատի հակամարտությունների քանակը: Ըստ Ռուսաստանի նախագահի խորհրդական Սերգեյ Գլազևի՝ «Եթե ԵԱՏՄ-ն ընդգրկի հետխորհրդային տարածքի բոլոր երկրները, ապա հակամարտություն շատ քիչ կլինի։ Մեր դիրքորոշումն այն է, որ հետխորհրդային տարածքներում հակամարտությունները պետք է լուծվեն բանակցությունների, խորհրդակցությունների և փոխզիջումների միջոցով։ Մենք շահագրգռված ենք, որպեսզի հակամարտություններ չլինեն», - ղարաբաղյան կարգավորման մասին հարցին ի պատասխան ասել է նա։ Գլազևի խոսքով՝ ԵԱՏՄ-ն բաց է բոլորի համար։ Արդեն տևական ժամանակ, հիշեցնենք, որ ԶԼՄ-ներում քննարկվում էին Ադրբեջանի՝ ԵԱՏՄ հնարավոր մուտքի մասին վերլուծություններ, իսկ ամիսների առաջ Ադրբեջանում բռնկվեցին այդ երկրի՝ ՀԱՊԿ-ին անդամակցելու հնարավորությունների շուրջ քննարկումները՝ դարձյալ ղարաբաղյան խաղաքարտի շահարկմամբ: Պաշտոնական Երևանը մշտապես հայտարարել է, որ նման հարցի քննարկման դեպքում օգտվելու է վետոյի իր իրավունքից։ Եվ ահա, երեկ պաշտոնական Բաքուն անդրադարձել է Ադրբեջանի՝ ՀԱՊԿ –ին անդամակցելու թեմային: «ՌԻԱ Նովոստիի» հետ զրույցում Ադրբեջանի արտգործնախարար Էլմար Մամեդյարովն անդրադառնալով Ադրբեջանի հնարավոր անդամակցությանը ՀԱՊԿ-ին՝ նշել է, որ իրենք վարում են հավասարակշռված քաղաքականությունը՝ ակտիվ երկկողմ երկխոսություն ծավալելով և փոխշահավետ իրավահավասար համագործակցություն զարգացնելով ՀԱՊԿ բոլոր անդամ-պետությունների հետ՝ «բացառությամբ, բնականաբար Հայաստանի»: Պաշտոնական Բաքվում, փաստորեն, շարունակում են Ադրբեջանի անդամակցության հարցը՝ ԵԱՏՄ-ին ու ՀԱՊԿ-ին առկախված պահել: Սա նշանակում է, որ Բաքուն Մոսկվայից չի ստանում Ղարաբաղյան հարցով ցանկալի հավաստիացումներ: Բայց հետաքրքրականն այն է, որ Մոսկվան էլ չնայած այդ ամենին հետևողականորեն շարունակում է հույսեր փայփայել՝ կազմակերպությունները դուռը բաց պահելով Ալիևի առջև: Մետաքսյա Շալունց
Հետևեք մեզ Viber-ում
