Որևէ մեկը չպետք է օրենքները, կարգուկանոնը խարխլի, սա հրամայական է բոլորի համար. Դ. Բաբայանը՝ «Սասնա Ծռեր» կուսակցության Արցախի կազմակերպության մասին

Արցախի նախագահի մամուլի քարտուղար Դավիթ Բաբայանը Tert.am-ի հետ զրույցում անդրադառնալով «Սասնա Ծռեր» կուսակցության Արցախի կազմակերպության հիմնադիր համագումարին՝ նկատեց, որ ամեն ինչ պետք է դիտարկել, նախ և առաջ, իրավական դաշտում: Ըստ Բաբայանի՝ Արցախի իշխանությունների քայլերը միայն բխելու են օրենքի շրջանակներում՝ առանց որևէ նախատրամադրվածություն ունենալու:  «Ցանկացած քայլ, ցանկացած մտահղացում պետք է միանշանակ համապատասխանի օրենքներին: Իհարկե, ցանկացած մարդ իրավունք ունի քաղաքական ուժ հիմնելու, ժողովրդավարական երկիր է, բայց ամեն ինչ պետք է լինի բացառապես օրենքի սահմաններում, որևէ մեկը որևէ արտոնություն չի ունենա, որևէ մեկը չի կարող լինել յուրային և որևէ մեկը չի կարող լինել թշվառ, դա միանշակ է»,- ասաց Բաբայանը: Հիշեցնենք, որ «Սասնա Ծռեր» կուսակցության արցախյան կազմակերպության  հիմնադիր համագումարը  նախատեսված է անցկացնել նոյեմբերի 17-ին: «Սասնա Ծռեր» համահայկական կուսակցությունը հայտարարություն է տարածել, որ կազմակերպում է մեծ ավտոերթ դեպի Արցախ` մասնակցելու «Սասնա Ծռեր» արցախյան կուսակցության հիմնադիր համագումարին: Հարցին, թե հաշվի առնելով 2015թ-ին Բերձորի մոտ «Սասնա ծռերի» անդամների  հետ տեղի ունեցած միջադեպը,  երբ նախկինում «Հիմնադիր խորհրդարան» կոչվող կառույցի  անդամների մեքենաների մուտքը թույլ չէր տրվել Արցախ, նրանց ծեծի էին ենթարկել, ջարդել մեքենաների ապակիները, ինչպե՞ս են հիմա Արցախում նրանց հանդեպ ունեցած տրամադրությունները, Բաբայանը կրկնեց, որ ամեն ինչ օրենքի սահմանում պետք է լինի: «Մի բան հստակ է, որևէ մեկը չպետք է պետության և ժողովրդի օրենքները, կարգուկանոնը խարխլի, սա հրամայական է բոլորի համար: Ինչ վերաբերում է բնակչության մոտեցումներին, ապա  դրանք հասկանալու լավագույն և միակ տարբերակը ընտրություններն են, որոնք տեղի կունենան 2020 թվականին և որտեղ յուրաքանչյուրը  իրավունք կունենա առաջադրել թեկնածություն, լինի խորհրդարանական, թե այլ տիպի ընտրություն»,-ասաց նա: