Շարքային Գ. Հարոյանի մահվան դեպքով ձերբակալվել է վաշտի հրամանատար կապիտանը, կալանավորվել կրտսեր սերժանտը

Շարքային Գևորգ Հարոյանի մահվան դեպքի առթիվ առաջին կայազորային քննչական բաժնում ՀՀ քրեական օրենսգրքի 110-րդ հոդվածի 1-ին մասով հարուցված քրեական գործով կատարված բազմակողմանի քննության արդյունքում տվյալներ են ձեռք բերվել՝ զինվորական ծառայության պարտականությունները կատարելու կապակցությամբ կրտսեր սերժանտի կողմից Գ.Հարոյանի նկատմամբ բռնություն գործադրելու վերաբերյալ: Ձեռք բերված բավարար ապացույցների համակցությամբ՝ պարտադիր ժամկետային զինծառայող, կրտսեր սերժանտին մեղադրանք է առաջադրվել՝ ՀՀ քրեական օրենսգրքի 358.1-րդ հոդվածի 4-րդ մասով, և նրա նկատմամբ որպես խափանման միջոց է ընտրվել կալանավորումը: Բացի այդ, իշխանության անգործություն ցուցաբերելու, ինչպես նաև զինվորական ծառայության պարտականությունները կատարելու կապակցությամբ ժամկետային զինծառայող, շարքային Գ.Հարոյանին վիրավորանք հասցնելու կասկածանքով՝ ՀՀ քրեական օրենսգրքի 375-րդ հոդվածի 1-ին մասով (իշխանությունը չարաշահելը, իշխանազանցությունը կամ իշխանության անգործությունը) և ՀՀ քրեական օրենսգրքի 360-րդ հոդվածի 2-րդ մասով (զինծառայողին վիրավորանք հասցնելը), ձերբակալվել է վաշտի հրամանատար կապիտանը: Քրեական գործով նախաքննությունը շարունակվում է: Գյումրեցի շարքային Գևորգ Հարոյանը պարտադիր ժամկետային զինվորական ծառայության էր մեկնել այս տարվա հուլիսին: Զինվորը մահացել էր հոկտեմբերի 1-ին, ըստ ՀՀ Զինվորական քննչական վարչության տարածած հաղորդագրության ժամը 10:50-ի սահմաններում, վաշտի զինանոցում ինքն իրեն կրծքավանդակի շրջանում հասցրած հրազենային վիրավորումից: Հարոյանի ծնողները, սակայն դիմել էին ԶՄ-ներին և պնդել, որ իրենց տղան ոչ ինքնավնասվել է, ոչ էլ ինքնասպանություն է գործել, նրան դաժանաբար ծեծել և սպանել են: Նրանք որպես ապացույց էին մատնանշում Գևորգի մամնի վրայի բռնության հետքերը: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: