Նիկոլ Փաշինյանի կոշտ պատասխանը

Վարչապետ Նիկոլ Փաշինյանն այսօր լրագրողների հետ զրույցում ասաց, որ դեռ չի որոշել, թե երբ է հրաժարական տալու: «Ես չեմ ուզում մենք նմանվենք այն իշխանություններին, որ հանրութունը երկար ժամանակ պահանջում է հրաժարական տալ և նրանք համառորեն հրաժարական չեն տալիս, հիմա էլ՝ հանրությունը պահանջում է հրաժարական չտալ, իշխանությունը համառորեն հրաժարական է տալիս: Պետք է այնպես անել, որ այս իրավիճակը հասկանալի լինի բոլորի համար՝ իր բոլոր նրբութուններով: Եթե իմ որոշումով լիներ, արդեն պետք է տված լինեի, բայց քանի որ հանրության շրջանում շատ բուռն արձագանք կա, այդ սցենարի վրա ևս մեկ անգամ մանրամասն պետք է մտածենք, բայց դեկտեմբերին պետք է արտահերթ ընտրություններ լինեն»,-ասաց նա: Փաշինյանն անդրադարձավ նաև հայտարարություններին, որ եթե արտահերթ ընտրությունները մայիսին անցկացվեն, ՀՀԿ-ն պատրաստ է գրավոր համաձայնություն տալ, որ չեն առաջադրի իրենց թեկնածուին: «Ինչի, հիմա իրենք պատրաստվում են առաջադրե՞լ իրենց թեկնածուին: Դե գիտեք, դա նշանակում է, որ իրենք շարունակում են քաղաքական իրավիճակը չհասկանալ: Այսինքն՝ նրանք մի կողմից ասում են՝ հանդուրժողականության մթնոլորտ են ակնկալում, բայց ամեն ինչ անում են, որպեսզի հանրությունը շարունակի իրենց չհանդուրժել: Եվ սա, կարծում եմ, ճիշտ ճանապարհ չէ: Ես կոչ եմ անում ուղղակի այս ռեժիմցի դուրս գալ, որովհետև չի կարելի անընդհատ տպավորություն ստեղծել, որի նպատակն է խանգարել ժողովրդին, խանգարել պետությանը, երկրին՝ առաջ ընթանալու: Դա լավ դերակատում չէ, և կոչ եմ անում մեր ՀՀԿ-ական գործընկերներին ուղղակի դուրս գալ այդ դերակատարումից»,- ասաց նա: